Орол денгизида омон қолган ягона жонзотни балиқчилик билан шуғулланувчи давлатлар сотиб олмоқда

Орол денгизи сувида фақат битта жонзот — артемия омон қолди. Бу ҳақда ЎзА хабар бермоқда.

Артемия 100 миллион йиллардан буён ўзгаришсиз келаётган оддий организмлардан бири. У ер юзида асосан хлорли, сульфатли, карбонатли, ҳар литрида 300 граммгача тузи бор шўр сувда учрайди. Улар сув ўтлари, бактериялар билан озиқланади. Орол денгизидаги артемиялар асосан урғочи, лекин улар ўз-ўзидан кўпайиш хусусиятига эга.

Орол денгизидан артемия цисталарини йиғиб олиб сотиш билан шуғулланадиган 10 дан ортиқ фирма ва корхона мавжуд. Уларни балиқчилик билан шуғулланувчи қатор давлатлар сотиб олмоқда. Маҳаллий балиқчилик хўжаликлари ҳам албатта фойдаланади.

Артемия цисталари асосан Хитой, АҚШ, Россия, Қозоғистон, Мўғулистон ва Эрон давлатларининг тузли кўлларида етиштирилади. Ўзбекистонда эса фақат Орол денгизида учрайди.

У балиқ личинкалари учун жуда зарур озуқа. Оддий омухталар билан боқилган балиқ личинкаларининг 50 фоизи тирик қолиб ўсадиган бўлса, артемия личинкалари билан озиқланган балиқ личинкаларининг 90 фоиздан кўпроғи ҳеч қандай касалликсиз ривожланади.

Айни пайтда Ўзбекистон Фанлар академиясининг Қорақалпоғистон бўлими томонидан артемияларнинг яшаш шароити ва етиштириш даражасини ўрганиш бўйича изланишлар олиб борилмоқда.