Ўзбекистонлик киноижодкорлар томонидан «101-рейс» фильмининг суратга олиниш ишлари ёзда бошланади, деб хабар беради ЎзА.
«101-рейс» бадиий фильми реал воқеага асосланган бўлиб, унда 2001 йил АҚШнинг Нью-Йорк шаҳрида содир этилган террорчилик ҳаракати оқибатида Шимолий Америка ҳаво ҳудудида қийин вазиятда қолган – бортида 180 нафар йўловчи бўлган «Ўзбекистон ҳаво йўллари» авиакомпаниясига қарашли Boeing-767 самолётининг 101-рейс экипажи кўрсатган жасорат ҳақида ҳикоя қилинади.
Фильм сюжети ҳақида:Постановкачи режиссёр — Акром Шоҳназаров, бош продюсер — Равшан Норбоев ҳамда Эркин Аъзам бадиий раҳбарлигида тайёрланган ушбу бадиий фильм «Ўзбеккино» миллий агентлигининг навбатдаги йиғилишида бадиий кенгаши томонидан бир овоздан маъқулланди.Мудҳиш воқеа оқибатида «Ўзбекистон ҳаво йўллари» миллий авиакомпаниясига қарашли Boeing-767 йўловчи самолёти Шимолий Американинг ҳаво ҳудудида қийин вазиятда қолиб кетди. Ёқилғи қолмаганлиги сабаб энг яқин аэропортга ҳам етиб бора олмаслиги ойдинлашган 101-рейс капитани Зархўжа Саидазимов барча масъулиятни зиммасига олиб, таваккал қилишга қарор беради. Бироқ уни олдинда бундан-да таҳликали вазият кутиб турган эди...
«Фильмда қатнашадиган актёр ва актрисалар гуруҳи жорий йилнинг май ойида аниқланади, — деди фильм продюсери Р. Норбоев. — Ёз ойларида эса суратга олиш ишлари бошланади. Ундаги 90 фоиз воқеалар самолёт бортида олиниши кутилмоқда. Ҳозирда бу борада тайёргарлик ишлари олиб борилиб, лойиҳанинг бош қаҳрамонлари учун номзодлар кўриб чиқилмоқда».
Изоҳ (0)