Шу йилнинг 6—18 октябрь кунлари Аргентинанинг Буэнос-Айрес шаҳрида ёшлар ўртасидаги Олимпиада беллашувлари старт олади. Унда иштирок этиш ниятида бўлган ўзбекистонлик курашчилар 2018 йилги юришни бошлади, деб ёзди МОҚ матбуот хизмати.
Олимпиадага лицензия берувчи мусобақа 10—13 май кунлари пойтахт Тошкентда ўтказилади. Демак, ўзбекистонлик спортчиларда иложи борича кўпроқ йўлланмага эга бўлиш имконияти юқори. Спортчилар май ойидаги қитъа чемпионатига тайёргарлик доирасида Бокудаги Мушвиг Исаев халқаро турнирида иштирок этди. Унда Россия, Қозоғистон, Грузия ва Озарбайжон спортчилари ҳам гиламга чиққани айтилган.
Юнон-рум кураши
Мазкур спорт турида ўзбекистонлик спортчилар мусобақани умумжамоа ҳисобида 3-ўринда якунлади. Аброр Нурмуҳамедов ўз вазн тоифасида олтин медални қўлга киритган бўлса, Бекзод Аҳмедовга кумуш насиб қилди. Яна икки ўзбекистонлик — Муҳаммад Поёнов ҳамда Хусанхон Юнусхонов бронза билан чекланди.Эркин кураш
Эркин курашда ўзбекистонликлар умумжамоа ҳисобида иккинчи бўлишга эришди. Умид Жалолов ва Муҳаммадрасул Раҳимов олтин медални тантана қилди. Нодир Раҳимовга кумуш медаль насиб қилди, Зафар Отахон бронзалик бўлди.
Изоҳ (0)