Грузия президенти Саакашвилини афв этишдан бош тортди

Грузия президенти Георгий Маргвелашвили ўз ватанида сиртдан суд қилинган Михаил Саакашвилини афв этишни режалаштирмаяпти. Бу ҳақда у «Рустави 2» телекомпаниясига берган интервьюсида айтиб ўтди, деб ёзади «РИА Новости».

«Қандай мантиқ бўйича Саакашвилини афв этишим керак? Прокуратура айбловни қандай эълон қилиш, текширувни қандай ташкиллаштиришни аниқлаб ололмаяпти, судья афв этиш ҳақидаги модданинг ноқонуний қўлланилиши чегарасини аниқлаштира олмаяпти. Хўш, Грузия президенти афв этиши ва шу билан уларнинг хатоларини тузатиши керакми?» — дея жаҳл билан гапирди Маргвелашвили.

«Афв қилиш — бу суд хатосини тузатиш эмас, бу раҳм-шафқат акти. Шундай воқелик қаршисида туриб, Саакашвилига нисбатан ҳис-туйғу кўрсата оламанми?» — деб сўради президент.

У Саакашвилини прокуратура ва суд «эски анъаналар бўйича фаолият олиб борадиган» тизимни яратганикда айблади, янги ҳукумат эса унга барҳам беришга қодир эмас.

5 январь куни Грузия суди мамлакатнинг собиқ президенти Михаил Саакашвилини сиртдан уч йиллик қамоқ жазосига ҳукм қилган эди.