Ўзбекистон матбуот ва ахборот агентлиги «Ислом цивилизациясининг буюк алломалари» мавзуида бадиий асарлар яратиш бўйича ижтимоий буюртмалар лойиҳасини эълон қилди.
«Ўзбекистон матбуот ва ахборот агентлиги юртимизда туғилиб, камол топган ва ислом дини ривожига, шунингдек, бутун башарият маънавий камолотига улкан ҳисса қўшган буюк бобокалонларимиз, хусусан, ҳадис илмининг султони Имом ал -Бухорий, Имом ат- Термизий, Абдухолиқ Ғиждувоний, Баҳовиддин Нақшбанд, Имом Мотуридий, Абул Муин Насафий каби улуғ зотларнинг ўлмас илмий-маърифий мероси, ибратли ҳаётини ва уларнинг инсон сифатидаги бадиий мукаммал образларини ҳаққоний гавдалантирувчи романларнинг яратилишига ҳисса қўшиш, муқаддас ислом динининг асл моҳиятини, унинг ривожида бобокалонларимизнинг улкан хизматларини аҳоли, айниқса, ёшлар орасида кенг ёритиш, шу билан бирга, адибларимиз, исломшунос олимлар ҳамда ёш тадқиқотчиларимизни маънавий ва моддий жиҳатдан қўллаб-қувватлаш мақсадида ‘Ислом цивилизациясининг буюк алломалари’ мавзуида бадиий асарлар яратиш бўйича ижтимоий буюртмалар лойиҳасини эълон қилади», — дейилади «Дарё»га тақдим этилган хабарномада.
Ижтимоий буюртмалар бўйича яратиладиган ижодий ишлар учун қуйидаги талаблар кўзда тутилган:
– муқаддас ислом динининг софлигини таъминлаш, унинг ривожи ва маънавий қадрини юксалтиришда ўзларининг ўчмас номларини қолдирган Имом ал-Бухорий, Имом ат- Термизий, Абдухолиқ Ғиждувоний, Баҳоуддин Нақшбанд, Имом Мотуридий, Абул Муин Насафий каби улуғ зотларнинг ўлмас илмий-маърифий мероси, ибратли ҳаётини ва уларнинг инсон сифатидаги бадиий мукаммал образларини юксак бадиий воситалар билан акс эттирувчи романлар яратиш;
– буюк алломаларнинг бадиий тимсолларини яратиш билан бирга ислом динининг бугунги жаҳон ҳамжамиятидаги ўрнининг муҳимлиги, инсониятни ташвишга солаётган глобал муаммоларни ҳал этишда исломий бағрикенглик ғояларининг аҳамиятини очиб бериш.
Буюртма берилган китоблар агентлик тизимидаги нашриётлар қошида таниқли адиблар, исломшунослар, диний арбоблар ҳамда тарихчи олимлардан иборат нуфузли ҳайъат томонидан баҳоланиб, нашриётларнинг ижтимоий грантлари асосида чоп этилади ва муаллифларга белгиланган тартибда қалам ҳақи берилади.
Нашриётлар ва муаллифлар ўртасида тузиладиган шартномада ижтимоий грантлар асосида яратиладиган китоб учун қалам ҳақининг маълум қисмини олдиндан тўлаш ҳам кўзда тутилади.
Изоҳ (0)