Наманганда «Ўзбекистон аёлларининг 100 энг яхши инновацион лойиҳаси» кўрик-танловининг вилоят босқичи бўлиб ўтди, деб хабар беради ЎзА.
Танловда зиёли, тадбиркор, ҳунарманд ва илмий иш устида изланаётган аёллар, олий ўқув юртида таҳсил олаётган талаба-қизлар, хотин-қизлар тиббиёт, таълим, спорт, илм-фан йўналишидан тортиб, мактабгача таълим, тадбиркорлик, қишлоқ хўжалигини ривожлантириш, миллий ҳунармандчилик, туризм ва ижтимоий масалаларни қамраб олган турли йўналишлар бўйича 20 га яқин мавзудаги янги инновацион лойиҳаларни намойиш этди.
Қайд этилишича, аксарият номинациялар бўйича тақдим этилган лойиҳаларнинг барчаси ўзининг иқтисодий ва ижтимоий аҳамияти билан диққатга сазовордир. Масалан, манзарали гуллар касалликларига қарши курашиш чораларидан тортиб, жамиятни руҳий ва ахлоқий соғломлаштиришда креатив ёндашув, ёшларни оилага тайёрлашда психологик ёндашув, ҳунармандчилик туризмини ривожлантириш ва педагогик йўналишлар сингари ўнлаб соҳалар истиқболига доир ихтироларни қамраб олган.
«Қанд жўхори поясидан фруктоза сиропи ва концентратларини олиш технологияси бўйича инновацион лойиҳам билан қатнашдим. Бунда қанд жўхори поясидан 35 фоизгача фруктоза сиропини олиш мумкин. Мазкур сироп асосида тайёрланган консерва – қандли диабет хасталигини даволашда импорт ўрнини босадиган маҳсулот тайёрлаш имконини беради. Қанд жўхори етиштириш рентабеллиги 29 фоизгача кўтарилиши лойиҳанинг иқтисодий самарадорлигидан далолат», – дейди Наманган муҳандислик технология институтининг қишлоқ хўжалик маҳсулотларини сақлаш ва дастлабки ишлаш технологияси кафедраси ассистенти Шоира Содиқова.
Изоҳ (0)