Ўзбекистон Республикаси Ички ишлар вазирлигида жиноят гувоҳлари ёки жабрланувчилар бўлган болаларни тергов жараёнларида ҳимоя қилишни кучайтириш мақсадида илк бор улар учун махсус сўров хонасини очиш маросими бўлиб ўтди. Бу ҳақда «Дарё»га UNICEF’нинг Ўзбекистондаги ваколатхонаси хабар берди.
Мазкур хонада болаларнинг ёши ва руҳий ҳолатини ҳисобга олган ҳолда уларни қўрқитмайдиган хавфсиз муҳит яратилган. Махсус хона илғор халқаро тажрибаларга асосланган ҳолда UNICEF кўмагида ташкил этилди.
«Биз суд жараёнида иштирок этаётган болалар ўзларини йўқотиб қўйишлари ёки руҳан қийналишларига йўл қўя олмаймиз. Шу боис, тергов жараёнида иштирок этаётган болаларни ҳимоя қилиш чора-тадбирларини таъминлаш учун, шунингдек, жиноят гувоҳлари ва жабрланувчилар бўлган болаларни сўроқ қилишда иштирок этган терговчилар болаларга дўстона муносабат тамойилларини кундалик амалиётда қўллашлари учун ҳаракат қиламиз», — деди Ўзбекистон ички ишлар вазирининг ўринбосари Акромхон Бобохонов.
Тергов жараёни даврида болаларни ҳимоя қилиш муҳитини яратиш, хусусан, руҳий босимни камайтириш мақсадида, болаларни сўроқ қилиш хонаси замонавий видео ва аудио воситалари билан жиҳозланган. Бу сўроқларни қайта-қайта ўтказмасликка, тергов жараёнида аудио-видео ёзувлардан далил сифатида фойдаланишга имкон беради. Ахборот-коммуникация технологияларини жорий этиш жиноят гувоҳлари ва жабрланувчилар бўлган болаларнинг ҳуқуқлари ва қонуний манфаатларини ҳимоя қилишни таъминлайди.
Ўз фаолияти орқали UNICEF ҳар бир боланинг ҳуқуқ ва фаровонлиги таъминланишига эришишга ҳаракат қилади. Ушбу мажбуриятни амалий ҳаракатларга айлантириш мақсадида ташкилот ўз ҳамкорлари билан биргаликда дунёнинг 190 мамлакати ва ҳудудларида иш олиб боради.
Изоҳ (0)