«Газета.uz» колумнистларидан бири Никита Макаренко Тошкентдаги қоидабузар ҳайдовчилардан бирини қандай қилиб 450 минг сўм жарима тўлашга мажбур қилгани ҳақида Facebook’даги саҳифасида хабар қолдирди. «Дарё» муаллифнинг ибратли пости таржимасини эътиборингизга ҳавола қилади.
Жиноят ва жазо 2.0
Қанчалик ҳайратланарли бўлмасин, мен ҳозир Тошкент шаҳар Йўл ҳаракати хавфсизлиги бош бошқармаси (ЙҲХББ)ни мақтайман. Бардам бўлинг.Шундай қилиб, мен тажриба ўтказиб кўришга — бир яхши бўлмаган ҳайдовчини фотосуратлар ва видео ёрдамида жазолашга қарор қилдим. Чунки назарий жиҳатдан шундай ҳаракат иш бериши керак — Маъмурий жавобгарлик тўғрисидаги кодекснинг 276-моддасига кўра, маъмурий ҳуқуқбузарлик тўғрисидаги иш очиш учун фото ва видео далил сифатида қабул қилиниши мумкин. Йўл ҳаракати қоидаларини бузиш эса айнан маъмурий ҳуқуқбузарлик ҳисобланади.
30 декабрь куни мана бу Epica’даги ўртоқ Қатортол бозори олдидаги икки полосали йўлнинг битта полосасида машинасини тўхтатиб қолдирди. У ерда шусиз ҳам қандай даҳшатли вазият ҳукмронлигидан хабардорсиз. У бўлса кўчадаги бир полосани эгаллаб, тирбандликни ҳам юзага келтирди. Мен унга танбеҳ бердим ва машинасини тасвирга олишимни айтиб, огоҳлантирдим. Шундан сўнг у двигателни ўчириб, машинасидан тушиб, «Менга барибир», деб кетди. Майли, дедим, сенга барибир бўлса — бўпти, дедим. Бу суратда Epica ҳайдовчисининг ўзи йўқ, чап томондаги одам — бошқа ҳайдовчи.
Мен фото ва видеони Ягона портал (my.gov.uz) орқали Ички ишлар вазирлигига юбордим ва маъмурий ҳуқуқбузарлик тўғрисидаги иш очиш учун далил сифатида қабул қилишни сўрадим. Байрамдан сўнг, роппа-роса бир ҳафта ўтгач (6 январь куни) менга Чилонзор туман Йўл ҳаракати хавфсизлиги бошқармаси инспектори қўнғироқ қилиб, тафсилотларни сўради. У ҳаддан ташқари хушмуомала эди, бунинг учун ундан жуда миннатдорман.
Шу заҳоти муаммо борлиги маълум бўлди: Ягона портал фақат битта файлни юклаш имконини бераркан ва ўша файл ҳам унга етиб бормаган. Чунки унга менинг аризамни файлларсиз топширишибди. Ҳамма маълумотларни унинг шахсий телефон рақамига Telegram орқали юборишга тўғри келди.
Орадан икки кун ўтиб, 8 январда у менга яна қўнғироқ қилиб, маъмурий ҳуқуқбузарлик тўғрисидаги баённома ҳақиқатан ҳам тузилганига ишонч ҳосил қилиш учун келиб кетишни сўради. Ҳаммаси қоидадек бўлганди: қўрс ҳайдовчининг ҳайдовчилик гувоҳномаси олиб қўйилган, унга нисбатан баённома тузилган, Маъмурий жавобгарлик тўғрисидаги кодекснинг 128-6-моддаси 1-қисми («Транспорт воситалари ҳайдовчиларининг тўхташ ёки тўхтаб туриш қоидаларини бузиши») бўйича 450 минг сўмлик жарима ёзилган.
Хулоса:
- Тизим ишлаяпти.
- Яхши бўлмаган ҳайдовчиларни осон жазолаш мумкин.
- ЙҲХББ ҳаддан ташқари хушмуомала.
- ЙҲХББнинг телефонлар учун мобил дастури ёки ҳеч бўлмаса фуқаролар мурожаат қила олиши учун расмий Telegram-ботини ишга туширамиз.
- Маъмурий жавобгарлик тўғрисидаги кодексни сал-пал таҳрирлаймиз.
- Ҳаммамиз қоидабузар ҳайдовчиларнинг суратларини юборамиз.
- ...
- PROFIT (ЙҲХББ пул кўринишида фойда кўради, биз эса тарбиявий жараёндан қониқиш ҳосил қиламиз).
«Дарё»дан қўшимча: Маъмурий жавобгарлик тўғрисидаги кодекснинг 128-6-моддаси 1-қисмида назарда тутилган қоидабузарлик («Транспорт воситалари ҳайдовчиларининг тўхташ ёки тўхтаб туриш қоидаларини бузиши») бўйича ҳайдовчилар энг кам иш ҳақининг уч баравари миқдорида жаримага тортилади. 2017 йил 1 декабрига қадар жарима миқдори 449 325 сўм эди (яхлитлаб 450 минг сўм деса ҳам бўлади), 1 декабрдан бошлаб эса — 516 720 сўм (шу кундан Ўзбекистонда энг кам иш ҳақи миқдори 149 775 сўмдан 172 240 сўмга ошган).
Изоҳ (0)