Тошкент шаҳридан Қозоғистоннинг Чимкент шаҳрига автобус қатнови 8 январдан бошлаб йўлга қўйилади. Бугун, 5 январь куни Тошкент вақти билан соат 08:00 да «Тошкент» автовокзалидан «Тошкент – Чимкент – Тошкент» йўналишида Ўзбекистон делегацияси аъзолари ўрин олган илк автобус йўлга чиқди. Бу ҳақда Ўзбекистон автомобиль ва дарё транспорти агентлигига таяниб, «Газета.uz» хабар берди.
8 январдан бошлаб йўловчи автобуслари ҳар куни соат 06:00—07:00 дан 19:00—20:00 гача бир соатлик фарқ билан қатнай бошлайди.
«Рейслар вақти мавсумга қараб ўзгариб туриши мумкин. Агарда Ички ишлар вазирлиги рухсат берса соат 21:00—22:00 оралиғида қатновчи тунги рейслар ҳам йўлга қўйилади», — дея таъкидлайди агентлик.
Йўналиш бўйича жами 20 та қулай, узоқ масофага мўлжалланган туристик автобуслар — MAN, Mercedes-Benz ва Higer қатнайди.
Маршрутнинг узунлиги 145,2 километр бўлиб, йўл 3—3,5 соатда босиб ўтилади. Рейслар назорат-ўтказиш пунктларидаги техник тўхтовларсиз амалга оширилади. Бу автобуслар, йўловчилар ва уларнинг юклари божхона кўриги ҳамда паспорт назоратидан чегарани кесиб ўтаётган бошқалардан фарқли ўлароқ навбатсиз ўтказилади.
Автобуслар чегарани «Ғишт кўприк» (Ўзбекистон) ва «Жибек жоли» (Қозоғистон) назорат-ўтказиш пунктидан кесиб ўтади. Маршрутнинг охирги нуқталари «Тошкент» (Ўзбекистон) ва «ШКААВ» (Қозоғистон) автобус бекатлари бўлади.
Шунингдек, Ўзбекистон автомобиль ва дарё транспорти агентлигининг маълум қилишича, келажакда Қозоғистон шаҳарларини Ўзбекистоннинг тарихий шаҳарлари — Самарқанд, Бухоро ва Хива билан боғлашни режалаштирмоқда.
Изоҳ (0)