АҚШ Дональд Трамп президентлиги даврида 29 022 қочоқ қабул қилди. Бу охирги 15 йилдаги энг паст кўрсаткичдир. Бу ҳақда 3 январь, чоршанба куни USA Today газетаси Давлат департаменти маълумотларига таяниб хабар қилди, деб ёзади «ТАСС».
Нашрнинг маълум қилишича, охирги марта бундай кам кўрсаткич 2002 йилда қайд этилган. Ўшанда 2001 йилнинг 11 сентябрида Нью-Йорк ва Вашингтонда «Ал-Қоида» гуруҳи жангарилари томонидан терактлар амалга оширилгандан сўнг қонуний иммиграция оқими сезиларли даражада камайтирилган эди.
Президентлар кичик Жорж Буш ва Барак Обама даврида қочоқларни қабул қилиш квотаси йилига 70 мингдан 80 минг кишигача бўлган.
Газета Трамп сайловолди кампаниясидаёқ мамлакат иммиграция сиёсатини қатъийлаштиришга ваъда берганлигини эслатади. Президентлик лавозимини бажаришга киришгандан бир ҳафта ўтибоқ, Трамп АҚШда жамоат хавфсизлигини мустаҳкамлашга қаратилган ҳужжатни имзолади. Фармон мажбурий кўчиб келаётган кишилар маълумотларини текшириш жараёнларини таҳлил қилиш учун қочоқлар қабул қилиш дастурини 120 кунга тўхтатишни кўзда тутди.
Президентнинг таъкидлашича, қочоқлар кўринишида мамлакатга террорчилар кириб келиши мумкин. Октябрда Трамп 2018-молиявий йилда (2017 йилнинг 1 октябридан бошланган) 45 мингдан ортиқ бўлмаган қочоқларни қабул қилиш квотасини белгиловчи фармонни имзолади.
Изоҳ (0)