Трампни ўлдириш билан таҳдид қилган америкаликка нисбатан айбловлар илгари сурилди

АҚШ президенти Дональд Трампнинг ҳаётига таҳдид қилган Юта штатида яшовчи фуқарога нисбатан айбловлар илгари сурилди, деб хабар беради «ТАСС».

Маълумотларга кўра, 33 ёшли Трэвис Люк Домингес декабрь ойининг бошида маҳаллий полиция бўлинмасига электрон хат юбориб, унда Трампни ўлдиришни истаётганини маълум қилган.

«Мен эрталаб туриб, президентни ўлдиришга қарор қилдим», — деб ёзди у ўз хатида. Шунингдек фуқаро агарда ҳуқуқ-тартибот органлари ходимлари уни тўхтатишга уринса, уларни ҳам ўлдириш билан таҳдид қилган.

Шу куннинг ўзидаёқ Домингес Оқ уй раҳбари ҳаётига таҳдид қилинган яна бир хатни полицияга жўнатди. Мазкур хатда фуқаро Трампни ирқчиликда айблаган.

Бундан ташқари, прокуратурадан маълум қилишларича, Домингес оммавий отишма ташкиллаштириш ва кинотеатрни портлатиш билан таҳдид қилган.

Ҳукумат вакиллари эркак ўз баёнотида маълум қилган режаларини амалга оширмоқчи бўлганини тасдиқловчи далиллар борлигини маълум қилган.

Домингес 31 декабрь куни қўлга олинган. Унга нисбатан президент ва ҳуқуқ-тартибот органлари ходимлари ҳаётига суиқасд қилиш таҳдидини тарқатиш ҳамда полицияга ёлғон маълумот бериш каби жами 11 та пункт бўйича айбловлар илгари сурилмоқда.

Домингес ҳар бир пункт бўйича 10 йилгача озодликдан маҳрум этиш жазосига ҳукм қилиниши мумкин.