2018 йил давомида ўзбекистонлик футболчилар ва мухлисларни қандай мусобақалар кутиб турибди?

Ўзбекистон миллий терма жамоаси Россия—2018 мундиалида иштирок этиш имкониятини қўлдан бой берган. Шу тариқа ҳар тўрт йилликнинг футболдаги энг йирик мусобақаси навбатдаги бор ҳам Ўзбекистон терма жамоасисиз ўтади.

«Championat.asia» нашри ўзбекистонлик футболчилар ва мухлисларни 2018 йил давомида қандай турнирлар кутиб тургани борасида маълумот берди. Шу йилдан бошлаб мамлакат Олий Лигаси Супер Лигага, Биринчи Лига эса Про-Лигага ўзгараётганидан келиб чиқилса, йил қизиқарли кечиши турган гап.

Осиё Чемпионати U23

Йилдаги илк турнир 9 январь куни Хитойда старт олади ва 27 январга қадар давом этади. Унда Равшан Ҳайдаров бошқарувидаги Ўзбекистон терма жамоаси иштирок этади. Гуруҳдаги рақиблар: Хитой, Қатар ва Уммон.

ЎФФ Равшан Ҳайдаров олдига чемпионлик вазифасини қўйди. Осиё Чемпионати 10 кундан сўнг старт олади

Осиё Чемпионлар Лигаси

30 январь куни мусобақанинг саралаши старт олади ва унда Ўзбекистоннинг 2 та клуби иштирок этади. «Насаф» Қаршида Иорданиянинг «Ал-Файсалий» клубини қабул қилса, «Пахтакор» Қатарда «Ал-Гарафа»га қарши кураш олиб боради.

Ўзбекистон чемпиони сифатида «Локомотив» Чемпионлар Лигасидаги иштирокини гуруҳ босқичидан бошлайди. «Пахтакор» ва «Насаф»да плей-оффдан кейиноқ турнирдан чиқиб кетиш хавфи бор. «Темирйўлчилар» эса гуруҳ босқичида 6 та ўйинда иштирок этади.

Супер Лига

Ўзбекистон Олий Лигаси энди Супер Лига деб юритилади ва унда 12 та клуб чемпионлик учун кураш олиб боради. Форматда анчагина ўзгариш бор. Дастлаб жамоалар уй-сафар тизимида 22 та тур ўтказади. Кейин эса дастлабки олти клуб чемпионлик йўлида, қолганлар Про-Лигага тушиб кетмаслик учун алоҳида курашиб кўради. Жами 32 та турдан кейин мамлакат чемпиони номига ойдинлик киритилади.

Ўзбекистон Супер Лигасининг регламенти тасдиқланди. Энди зўрлар ичида зўр бўлган клубга чемпионлик насиб қилади

Про-Лига

Биринчи Лига бундан буён Про-Лига деб номланади. Бунда 16 та жамоа қатнашади. Улар икки даврали тизимда жами 30 тадан учрашув ўтказади. Қизиғи, Про-Лигада қатнашадиган клублар ҳам Супер Лиганики каби тўлиқ маълум эмас.

Ўзбекистон Кубоги

Охирги йилларда кубокка бўлган қизиқиш анча пасайгандек. Чунки финални ҳисобга олмаганда, қолган ўйинларга томошабинлар кўп келаётгани йўқ, деб ёзди «Championat.asia». Янгилик сифатида «Локомотив», «Бунёдкор», «Насаф» ва «Пахтакор» кабиларнинг кубок ўйинларига 1/8 финалдан бошлаб қўшилишини айтиш мумкин.

Осиё Чемпионати. Футзал

1—11 февраль кунлари Хитой Тайпейида футзал бўйича навбатдаги Осиё Чемпионати бўлиб ўтади. Ўзбекистон футзал терма жамоаси унинг «B» гуруҳида Япония, Тожикистон ва Жанубий Кореяга қарши баҳс олиб боради.

Клублар ўртасидаги Осиё Чемпионати. Футзал

1—12 август кунлари футзал бўйича клублар ўртасидаги Осиё Чемпионати бўлиб ўтади. Ўзбекистон чемпиони сифатида «Олмалиқ» футзал клуби мазкур турнирда қатнашади.

Ўзбекистонликлар иштирок этмайдиган турнирлар

Ўзбекистонликлар фақат мухлис сифатидагина кузатадиган мусобақалар ҳам бор. Биринчиси — Жаҳон Чемпионати. Россиядаги мундиал 14 июнь — 15 июль оралиғида бўлиб ўтади.

Шунингдек, кузда ўтказиладиган ўсмирлар ва ёшлар ўртасидаги Осиё Чемпионатларини ҳам томошабин сифатида кузатишга тўғри келади. Негаки, Ўзбекистоннинг ҳам ўсмирлар, ҳам ёшлар терма жамоаси саралашдан муваффақиятли ўта олмаган.