Янги йилдаги қўшимча дам олиш кунлари 6 кунлик иш ҳафтаси учун ҳам амал қиладими?

Президент Фармонига мувофиқ эълон қилинган қўшимча дам олиш кунлари барча ходимларга (хусусан, 6 кунликларга ҳам) тааллуқли, шанбадан кўчирилган дам олиш кунлари эса фақат 5 кунлик иш ҳафтасида ишловчи ходимларга алоқадор. Бу ҳақда ҳуқуқшунос Хушнудбек Худайбердиев Facebook’даги саҳифасида маълум қилди.

«Дам олиш кунлари ҳақидаги Президент Фармони бўйича энг кўп берилаётган саволга илмим етганича жавоб бериб ўтмоқчиман. Яъни бу дам олиш кунлари 6 кунлик иш ҳафтасида фаолият олиб борувчиларга ҳам қўлланадими, деб сўрашмоқда.

Жавоби: қўшимча дам олиш кунлари барча ходимларга (хусусан, 6 кунликларга ҳам) тааллуқли, шанбадан кўчирилган дам олиш кунлари эса фақат 5 кунлик иш ҳафтасида ишловчи ходимларга алоқадор.

Янги йил арафасидаги дам олиш кунлари мисолида буни тушунтиришга ҳаракат қиламан.

Ҳафтасига 5 кун ишловчи ходимларга қуйидаги кунлар дам олиш куни ҳисобланади:1) 30 декабрь – шанба;2) 31 декабрь – якшанба;3) 1 январь – Янги йил байрами;4) 2 январь – қўшимча дам олиш куни;5) 3 январь – кўчирилган дам олиш куни.Изоҳ: 6 январь, шанба куни ҳафтасига 5 кун ишловчилар учун расман иш куни бўлади.

Ҳафтасига 6 кун ишловчи ходимлар учун қуйидаги кунлар дам олиш куни ҳисобланади:1) 31 декабрь – якшанба;2) 1 январь – Янги йил байрами;3) 2 январь – қўшимча дам олиш куни», — деб ёзди блогер.