Ўзбекистон Президенти Шавкат Мирзиёев билан Туркманистон президенти Гурбангули Бердимуҳамедов ўртасида 30 декабрь куни телефон орқали мулоқот бўлиб ўтди. Бу ҳақда Ўзбекистон Президенти матбуот хизмати хабар бермоқда.
Суҳбат аввалида Шавкат Мирзиёев Туркманистон президентини кириб келаётган Янги йил билан самимий табриклаб, қардош туркман халқига тинчлик, барқарорлик ва фаровонлик тилади.
Туркманистон раҳбари, ўз навбатида, Президент Шавкат Мирзиёев ва кўпмиллатли қардош Ўзбекистон халқини яқинлашиб келаётган байрам муносабати билан чин дилдан муборакбод этиб, тараққиёт ва фаровонлик тилади.
Хабар беришларича, давлатлар раҳбарлари якунига етаётган 2017 йил икки мамлакат ўртасидаги анъанавий яқин алоқаларни ривожлантириш, дўстлик ва яхши қўшничилик муносабатларини мустаҳкамлашда тарихий давр бўлганини чуқур мамнуният билан қайд этган.
Олий даражадаги доимий мулоқотлар Ўзбекистон—Туркманистон ҳамкорлигини сифат жиҳатидан янги босқичга кўтаргани ва амалий мазмун билан бойитгани таъкидланган.
Президентлар Ўзбекистон ва Туркманистон ўртасидаги кўп қиррали шерикликни янада ривожлантириш, аввало, савдо-иқтисодий соҳада янги лойиҳа ва дастурларни амалга ошириш муҳимлигини алоҳида қайд этган.
Ўзбекистон ва Туркманистон раҳбарлари, шунингдек, халқаро сиёсат ва минтақавий ҳамкорликнинг долзарб масалалари бўйича фикр алмашган.
Изоҳ (0)