ОАВ ходимлари Тошкент ҳарбий округида жойлашган ҳарбий қисмларнинг бирида 3 ой синов муддати билан жорий этилган аутсорсинг тизими ҳамда муддатли ҳарбий хизматчилар таомномаси билан яқиндан танишди. Бу ҳақда Мудофаа вазирлиги матбуот хизмати хабар бермоқда.
Вазирлар Маҳкамасининг «Мудофаа вазирлиги ҳарбий хизматчиларининг озиқ-овқат таъминотини тубдан яхшилаш чора-тадбирлари тўғрисида»ги қарорига асосан, Тошкент ҳарбий округи қўшинлари ҳарбий хизматчиларининг овқатланиш тизими янги — аутсорсинг тизимига босқичма-босқич ўтказилмоқда.
Мазкур тизим жанговар ўқув жараёнига кўпроқ вақт ажратиш, транспорт-логистика харажатларини оптималлаштириш ҳамда озиқ-овқат таъминотини янада такомиллаштиришга ёрдам беради.
Бугунги кунда Ўзбекистонда озиқ-овқат маҳсулотлари меъёри МДҲ давлатлари орасида энг қувватлиларидан бири эканлиги ҳарбий хизматчиларнинг сифатли овқатланишларини таъминлашга алоҳида эътибор берилаётганига далил бўлади.
Ҳарбий хизматчиларнинг озиқ-овқат таъминоти, шахсий таркиб овқатланишини ташкил қилиш, шунингдек, маҳсулотларга ишлов бериш ва овқат тайёрлаш технологиялари қоида ва талаблари ишлаб чиқилган ҳолда амалга оширилмоқда.
Маҳаллий ҳокимлик органлари билан ҳамкорликда ошхоналарни замонавий технологик жиҳозлар, юқори сифатли идиш-товоқлар билан таъминлаш борасидаги чора-тадбирлар амалга оширилмоқда.
Аутсорсинг тизимида бевосита қатнашаётган субъектларни қўллаб қувватлаш мақсадида ҳукумат томонидан бир қатор имтиёзлар белгиланган: хизмат кўрсатилаётган аутсорсер субъектлари ижара ва коммунал тўловлардан озод қилинган.
Айни пайтда ушбу тизим Тошкент ҳарбий округ қўшинларида тажрибадан ўтказилмоқда. Ягона норматив ҳуқуқий база ишлаб чиқиш устидан тегишли давлат идоралари билан ҳамкорликда иш олиб борилмоқда.
Изоҳ (0)