Курсдошини пичоқлаб, унинг ҳаётдан кўз юмишига сабабчи бўлган Тошкент юридик коллежининг 3-курс ўқувчиси Саидкамрон Саидвоҳидовнинг иши судга оширилди. Бу ҳақда UZ24 хабар бермоқда.
UZ24’нинг Тошкент шаҳар ИИББда бўлиб ўтган брифингда шаҳар прокуратураси вакили Бобир Деҳқонов эълон қилган маълумотларга асосланиб хабар беришича, Саидвоҳидов содир этган жиноий иш бўйича тергов жараёни якунига етган.
Хабар беришларича, жиноий иш айни вақтда жиноят ишлари бўйича Учтепа туман судида кўриб чиқилмоқда. Хабарда суд қачон бўлиши ҳақида қўшимча ахборот берилмаган.
Тошкент юридик коллежидаги ўқувчилардан бирининг ўлими билан тугаган ҳодиса 6 октябрь куни тонгда юз берган эди. Коллежнинг 3-курс ўқувчилари — 2000 йилда туғилган Саидкамрон Саидвоҳидов, Асадбек Парпибоев ва 1999 йилда туғилган Раҳматилла Ёрқориев ўртасида келишмовчилик келиб чиққан.
Саидкамрон Саидвоҳидов пичоқ билан Асадбек Парпибоев ва Раҳматилла Ёрқориевнинг чап оёқ сон қисмига бир мартадан уриб тан жароҳати етказган. Натижада Парпибоев олган жароҳати оқибатида шифохонада вафот этган, Ёрқориевга шифохонада тиббий ёрдам кўрсатилиб, уйига юборилган.
Бу воқеадан кўп ўтмай коллеж директори Наталя Темирова ишдан олинди ва, Тошкент шаҳар прокуратураси вакили Бобир Деҳқоновнинг сўзларига кўра, айни вақтда қамоқда сақланмоқда.
Изоҳ (0)