Ўзи раҳбарлик қилаётган тумандаги таълим муассасаларининг раҳбарларини уриб, ҳақоратлагани билан танилиб кетган Сирдарё вилоятининг Сайхунобод тумани ҳокими Носиржон Эгамбердиев унинг бу ҳаракатларини яширинча видеога туширган коллеж директори устидан прокуратурага шикоят қилди. Бу ҳақда «Kun.uz» хабар бермоқда.
Хабар беришларича, ҳоким Эгамбердиев туман прокурори номига топширган аризасида 2017 йил 28 август куни туман ҳокимлигида бўлиб ўтган йиғилишдаги можароли вазиятни яширинча видеога олиб, ОАВга чиқариб юборган ва бу билан унинг обрўсига путур етказган шахсларга қонуний чора кўришни сўраган.
Айнан шу йиғилишда ҳоким тумандаги таълим муассасалари раҳбарларини уриб, ҳақорат қилган эди. «Kun.uz»нинг вилоят прокуратурасига асосланиб тарқатган ахборотида бу ҳаракатлар ҳудудда ўтказилган «Мустақиллик байрамига қўл остидаги ходимларни маданий ҳордиқ чиқариш учун олиб келмаган таълим муассасалари раҳбарларини ҳақоратлаб, уларга қўл теккизиш» ҳолати деб таърифланган.
Туман прокуратураси ҳокимнинг аризаси асосида текширув олиб бориб, яширинча олинган ва ОАВга тарқатилган видео муаллифи Сайхунобод саноат касб-ҳунар коллежи директори Комилжон Раҳмонов эканини аниқлаган. Унинг ҳаракатлари Маъмурий жавобгарлик тўғрисидаги кодекснинг 46-моддаси («Фуқарога маънавий ва моддий зарар етказиши мумкин бўлган маълумотларни ошкор этиш») бўйича тавсифланган ва шу модда бўйича маъмурий ҳуқуқбузарлик тўғрисида иш қўзғатилган.
Ҳозирги вақтда иш кўриб чиқиш учун маъмурий ишлар бўйича Сайхунобод туман судига юборилган. «Эндиликда унга энг кам ойлик иш ҳақининг 2 бараваригача миқдорда жарима солиниши мумкин», — деб ёзади «Kun.uz». МЖтКнинг 46-моддаси бўйича айбдор деб топилганлар энг кам иш ҳақининг 0,5 баробардан 2 баробаригача, мансабдор шахс бўлса — 2 баробаридан 5 баробаригача миқдорда жаримага тортилади.
Қайд этиш жоиз, Сирдарё вилоят прокуратураси ҳоким Эгамбердиевнинг директорларни уриши ҳодисаси юзасидан текширув олиб борган ва унинг ҳаракатларини МЖтКнинг 41- ва 183-моддалари бўйича тавсифлаб, маъмурий ҳуқуқбузарлик тўғрисида иш очган. Иш 28 декабрь куни маъмурий ишлар бўйича Сайхунобод туман судига юборилган.
Аввалроқ, шаҳардаги таълим муассасалари раҳбарларини ҳақорат қилган Андижон шаҳар ҳокими Дилмурод Раҳматуллаев энг кам иш ҳақининг 30 баробари миқдорида жаримага тортилгани маълум бўлган эди.
Изоҳ (0)