Ўзбекистон Республикаси адлия вазири Русланбек Давлетов ва унинг ўринбосарлари Тошкент шаҳри аҳолиси учун сайёр қабул ўтказди, деб хабар беради ЎзА.
Сайёр қабул икки кун давом этди.
«Адлия вазирлиги раҳбарлари ҳузурига моддий ёрдам олиш, уй-жой учун рўйхатга туриш, паспорт олиш, иссиқлиқ тизимидаги носозликни бартараф этиш, оқова сув қувурларини тозалаш каби масалалар билан келганлар кўпчиликни ташкил этди. Бундан кўринадики, жойлардаги маҳаллий ҳокимликлар ва бошқа хизмат кўрсатиш тизимлари ҳамон ўз вазифаларига совуққонлик билан қарамоқда. Акс ҳолда фуқаролар жойида ҳал этилиши мумкин бўлган оддий арзларини юқори ташкилотлар раҳбарларига кўтариб юрмаган бўларди», — дейилади хабарда.
Хабарда қайд этилишича, адлия вазирининг ҳузурига келган, ҳақиқатда уй-жой олишга эҳтиёжи бўлган 7 фуқаро уй-жой олиш учун туман ҳокимликларида рўйхатга олиниши таъминланди. Тегишли идораларга киритилган таклиф асосида 2 фуқарога моддий ёрдам ажратилди. 3 тадбиркорлик субъекти учун ижарага жой масаласи ҳал этилди. Кўплаб фуқароларга тегишли ҳуқуқий тушунтиришлар берилди.
Изоҳ (0)