Мактаб директорларини ҳақорат қилиб, уларни ураётгани видеоси тарқалиб кетган Сирдарё вилоятининг Сайхунобод тумани ҳокими Носиржон Эгамбердиевнинг иши 28 декабрь куни судга юборилди. Бу ҳақда, Сирдарё вилоят прокуратурасига асосланиб, «Kun.uz» хабар бермоқда.
Хабар беришларича, ҳоким Эгамбердиевга нисбатан вилоят прокуратураси томонидан Маъмурий жавобгарлик тўғрисидаги кодекснинг 41-моддаси (ҳақорат қилиш, яъни, шахснинг шаъни ва қадр-қимматини қасддан камситиш) ва 183-моддаси (майда безорилик, яъни, жамиятда юриш-туриш қоидаларини бузиш) бўйича маъмурий ҳуқуқбузарлик тўғрисида иш қўзғаган.
Маъмурий иш кўриб чиқилиши учун 28 декабрь куни маъмурий ишлар бўйича Сайхунобод туман судига юборилган. «Эндиликда туман суди ҳокимни 5 миллион сўмдан ортиқ миқдорда маъмурий жазога тортиши тахмин қилиняпти», — деб ёзади «Kun.uz».
Маълумот учун, Маъмурий жавобгарлик тўғрисидаги кодекснинг 41-моддаси («Ҳақорат қилиш») бўйича айбдор деб топилган шахс энг кам иш ҳақининг 20 бараваридан 40 бараваригача миқдорида жаримага тортилади, 183-модда («Майда безорилик») бўйича эса айбдор энг кам иш ҳақининг уч бараваридан беш бараваригача миқдорда жаримага тортилиши ёки 15 суткагача маъмурий қамоққа олиниши мумкин.
Ҳоким Носиржон Эгамбердиев Сайхунобод туманидаги мактабларнинг директорларини ураётгани акс этган видео сентябрь ойи ўрталарида интернет-нашрлар томонидан эълон қилинган, ижтимоий тармоқларда тарқалиб кетган эди. Маълумотларга кўра, директорлар вилоятдаги Мустақиллик байрамига етарли миқдорда иштирокчи олиб кела олмагани учун видеода кўрсатилгани каби «жазоланган».
Видео ОАВда эълон қилинган куниёқ — 12 сентябрда Сайхунобод туманида Сирдарё ҳокими Ғофуржон Мирзаев иштирокида йиғилиш ўтказилган. Шу йиғилишда Эгамбердиев қилган иши учун ўқитувчилардан узр сўрагани хабар қилинган эди. «Йиғилишда ушбу вазият юзасидан ҳали тегишли чора кўрилиши, у узр сўраш билан қутула олмаслиги қайд этиб ўтилган», — дейилган эди дастлабки хабарларда.
Ўшанда «Kun.uz» нашрининг манбаси «ҳокимнинг иши пахта терими мавсумидан кейин кўриб чиқилиши»ни, унинг «ишда қолиши масаласи юқоридан келадиган кўрсатмага боғлиқ»лигини маълум қилган эди. 13 сентябрь куни Бош прокуратурадаги манба Эгамбердиевнинг ҳаракатлари юзасидан Сирдарё вилоят прокуратураси текширув бошлаганини «Дарё»га маълум қилган эди.
Сайхунобод ҳокимининг масаласи қарийб «босди-босди» бўлиб улгурган эди, бироқ ноябрь ойи ўрталарида Андижон шаҳри ҳокими Дилмурод Раҳматуллаев коллеж директорларини ҳақорат қилгани билан боғлиқ янги можаро юзага чиқди. 26 декабрь куни ҳоким Раҳматуллаев Маъмурий жавобгарлик тўғрисидаги кодекснинг 41-моддасида кўрсатилган ҳолат бўйича айбдор деб топилиб, энг кам иш ҳақининг 30 баробари миқдорида жаримага тортилгани ҳақида хабар берилди (бироқ суд қачон бўлиб ўтганига аниқлик киритилмаган).
Изоҳ (0)