Ўзбекистон Президенти Шавкат Мирзиёев 23 декабрь куни Tashkent City халқаро ишбилармонлик маркази лойиҳаси билан яна бир бор танишди.
Tashkent City лойиҳаси ҳақида илк расмий хабар октябрь ўрталарида пайдо бўлган, концепциянинг илк суратлари ҳам ўшанда тақдим этилган эди. Октябрь охирида Шавкат Мирзиёев лойиҳа билан яқиндан танишган. «Шаҳар ичида шаҳар» қурилиши муносабати билан Навоий, Олмазор, Ислом Каримов ва Фурқат кўчалари оралиғидаги 80 гектар ҳудудда жойлашган ҳовлилар ва бир қатор маъмурий иншоотлар, жумладан, Киночилар уйи биноси бузилмоқда.
Нималар ўзгарган?
13 октябрда эълон қилинган дастлабки Tashkent City суратлари билан 28 октябрда Президент танишган лойиҳада битта сезиларли фарқ бор эди — Фурқат кўчаси бўйлаб жойлашган тўрт қаватли бинолар кўриниши ўзгарган.
Шавкат Мирзиёевнинг Tashkent City’га 23 декабрдаги ташрифи ҳақида ЎзА агентлиги ва «Ахборот 24» информацион теледастури томонидан тақдим этилган фото ва видеоматериалларда лойиҳанинг бошқа қисмларида ҳам ўзгаришлар бўлгани кўринди.
Хусусан, октябрдаги суратларни қўшиб ҳисоблаганда, Киночилар уйи ўрнида қад ростлайдиган иншоотларнинг уч хил варианти пайдо бўлган. Октябрдаги суратларда киносарой ўрнидаги майдон асосан яшил ҳудуд экани, унинг ёнида эса кўп қаватли маъмурий бино қад ростлагани акс этган эди.
«Ахборот 24»нинг 23 декабрдаги ташриф ҳақидаги лавҳасида Киночилар уйи ўрнида икки овалнинг туташувидан иборат катта бино сурати намойиш этилди. ЎзА маълумотига кўра, бу конгресс-холл, кўргазма маркази ва меҳмонхонадан иборат мажмуа эди.
Айни вақтда, худди шу куни ташриф жойидан ЎзА ва Президент матбуот хизмати эълон қилган Шавкат Мирзиёевнинг сурати фонидаги пешлавҳада Киночилар уйи ўрнида энди бошқа иншоот тургани кўрсатилган.
Киночилар уйи ўрнида қад ростлайдиган бинодан ташқари, 23 декабрдаги материалларда Олмазор кўчаси ёқасида — Лукоил компанияси қароргоҳи билан бир қаторда қуриладиган осмонўпар бинолар сони биттага кўпайган.
Киночилар уйининг 23 декабрдаги ҳолати
Президентнинг Tashkent City билан танишувига бағишланган «Ахборот 24»нинг 23 декабрдаги лавҳаси сўнгида Киночилар уйи бузилишидан лавҳача кўрсатилди. Мана унинг ҳолати:
Изоҳ (0)