Ўзбекистон Президенти Шавкат Мирзиёев 22 декабрь куни Олий Мажлис Сенати ва Қонунчилик палатаси аъзоларига Мурожаатнома йўллади. Президент мурожаати «Ўзбекистон 24» телеканали орқали жонли эфирда намойиш этилди.
Президент ўз мурожаати давомида аввалги йилларда тўпланиб қолган муаммо ва камчиликлар ҳақида тўхталар экан, бу масалалар ҳақида бош вазир бўлиб ишлаган вақтида ҳам бохабар бўлганини алоҳида таъкидлаб ўтди.
Мен Вазирлар Маҳкамасида 13 йил мебелларга қоровуллик қилиб ўтирганим йўқ. Ҳамма нарсани биламан. Шунинг учун эски командадан бирорта одам қолгани йўқ. Ҳаммаси янги одамлар. Бугунги гаплар, Мурожаатнома кўргазма учун эмас.Ҳар сафар 20 февралда мажлис бўларди, ҳаммамиз икки ой кутардик. Нимани кутардик? Саккиз фоизлик «бадиий асар»ни кутардик. Бунақанги саккиз фоизни «бадиий асар» дейдилар. Ялпи ишлаб чиқариш суръати саккиз фоиз бўлган мамлакатда сил ва бошқа касалликлар бўлмайди. Мана шуни ҳамма тушуниши керак.
Бугун айтилган ҳамма гаплар — менинг ичимдан чиққан, мени қийнаган масалалар, катта армон, халқимизнинг олдида қарздорлигим. Қарздорлигим!
Бир хиллар айтиши мумкин — сен бош вазир бўлиб ўтириб, шуларни билмагансан, деб. Билганман, лекин атроф жуда чатоқ эди. Буни билган одам билади. Шунинг учун мен очиқчасига гаплашяпман. Бу бировга ёқадими-ёқмайдими, менга энди барибир. Халқимиз энди бизни кечирмайди.
Шавкат Мирзиёев, Ўзбекистон Президенти
Изоҳ (0)