Тошкентнинг Сергели туманида янги қурилган уйлар олимлар, тадқиқотчилар, илмий изланувчиларга топширилди, деб хабар берди ЎзА.
Ўзбекистон Фанлар академияси томонидан тавсия этилган илмий салоҳиятга эга, билимли, тадқиқотлар олиб бораётган қирқ нафар ёш олим янги йил арафасида ўз уйларига эга бўлди.
Ўзбекистоннингнинг барча ҳудудларида замонавий ва миллий меъморчилик талаблари асосида барпо этилаётган янги уйлар имтиёзли равишда аҳолига тақдим этилмоқда.
Сергели туманида қурилаётган уйлар атрофида мактабгача таълим муассасалари, умумтаълим мактаблари, оилавий поликлиника, ёпиқ турдаги сузиш ҳавзаси, шаҳар милиция бўлинмаси, почта ва китоб дўкони, дам олиш масканлари, болалар майдончалари, автомобиль турар жойлари, велотрассалар барпо этилмоқда.
«Ипотека» акциядорлик тижорат банки кредитлари ҳисобидан фойдаланишга топширилган уйларнинг бошланғич тўлови умумий сумманинг 25 фоизи миқдорида бўлиб, кредитлар уч йиллик имтиёзли давр ва биринчи 5 йил мобайнида йиллик 7 фоиз миқдорида йигирма йил муддатга берилмоқда. Етти қаватли бинолар икки ва уч хонали хонадонлардан иборат.
Қуёш элементларини ривожлантириш, фотоэлектроника йўналишларида фойдаланиладиган «Янги ярим ўтказгичли бирикмалар олиш ва уларни тадқиқ этиш» мавзусида илмий изланишлар олиб бораётган Ўзбекистон Фанлар академиясининг Физика-техника институти кичик илмий ходими Қобилжон Омонов ҳам янги хонадонлардан бирига эга бўлди
«Биз узоқ йиллар ижарада яшаб келгандик. Турмуш ўртоғимнинг илмий изланишлари рағбатлантирилганидан хурсандмиз. Янги уй, айниқса, қизларимизнинг қувончига қувонч қўшди», — дейди Муниса Омонова.
Изоҳ (0)