Шавкат Мирзиёев жойларда ижтимоий-иқтисодий ислоҳотларнинг бориши, амалга оширилаётган бунёдкорлик ва ободонлаштириш ишлари, янги лойиҳалар билан танишиш, халқ билан мулоқот қилиш мақсадида Тошкент шаҳридаги бир қатор ижтимоий объектларга ташриф буюрди, деб хабар берди Президент матбуот хизмати.
Ўзбекистон Президенти дастлаб, Ўзбекистон ёзувчилар уюшмасининг Алишер Навоий номидаги Ўзбекистон Миллий боғи ҳудудида бунёд этилган янги биноси қурилиши ва Адиблар хиёбонида амалга оширилаётган ишлар билан танишди.
2017 йилнинг июнь ойида Шавкат Мирзиёев бу ерга ташриф буюриб, қурилиш ва ободонлаштириш билан боғлиқ топшириқлар берган эди. Ўтган 6 ой давомида 9,6 гектардан иборат майдонда улкан ишлар амалга оширилди. Ўзбекистон ёзувчилар уюшмасининг янги биноси қад ростлади. Бино икки қаватдан иборат бўлиб, унинг биринчи қаватига «Жаҳон адабиёти», «Шарқ юлдузи», «Ёшлик» журналлари таҳририятлари ҳамда «Ижод» жамоатчилик фонди жойлашади. Бинода 150 ўринлик фаоллар зали ҳам мавжуд бўлиб, у ижодий кечалар, бадиий муҳокамаларни шу ернинг ўзида ўтказиш имконини беради. Бинонинг иккинчи қаватида Ёзувчилар уюшмаси жойлашади. Унинг ҳузурида бой кутубхона ҳам ташкил этилади.
Шавкат Мирзиёев Уюшма мақомини кўтариш, уни халқимиз маънавиятини юксалтиришга таъсир кўрсатадиган муассасага айлантириш зарурлигини қайд этди.
«Навоий бобомиз доимо ҳаммани эзгуликка чорлаган, бугунги адабиётимиз, адибларимиз ҳам одамларни мустақилликни мустаҳкамлашга, бунёдкорлик ва саховатга, ёшларни ватанпарварликка даъват қилиши керак. Зиёли инсон, ижодкор ҳамиша халқ камолини ўйлайди. Бинобарин, юртимизда ижодкорлар қанча кўпайса, жамиятимиз учун шунча фойдали бўлади», — деди Ўзбекистон раҳбари.
Шавкат Мирзиёев адиблар учун ижод шароитини янада яхшилаш, хусусан, Уюшма ҳовлисини кишини илҳомлантирадиган гўзал гулзорга айлантириш юзасидан кўрсатмалар берди. Адиблар хиёбонида ҳар куни машҳур ўзбек шоирларининг шеърлари янграб туриши кераклиги, маънавий-маърифий аҳамиятини янада юксалтириш учун бу ерда очилган Адабиёт музейи янада бойитиш концепциясини ишлаб чиқиш ва амалга ошириш мақсадга мувофиқ эканини таъкидлади.
Шавкат Мирзиёев топшириғига биноан Уюшманинг кутубхонаси Алишер Навоий номидаги Миллий кутубхона билан боғланади, ижодкорлар унинг бой китоб фондидан шу ердан туриб бемалол фойдалана олади.
Изоҳ (0)