Twitter «мусулмонларга қарши» видеони жойлаштирган аккаунтни блоклади

Twitter маъмурияти Britain First ультра-ўнг ташкилотининг ижтимоий тармоқдаги аккаунтини блоклаб қўйди. Бунга унинг ўз саҳифасига «мусулмонларга қарши» видеони жойлаштиргани сабаб қилиб кўрсатилмоқда. Таъкидлаш жоизки, АҚШ президенти Дональд Трамп ҳам ушбу видеони репост қилган эди. Бу ҳақда The Guardian’га таяниб, «РБК» хабар берди.

Шунингдек, ҳаракат етакчиси Пол Голдинг ва унинг ўринбосари Жейда Френсеннинг ҳам Twitter’даги аккаунтлари блокланган.

Аввалроқ, ижтимоий тармоқ хавфсизлик нутқаи назаридан шу каби сиёсатни бошлагани ҳақида хабар берилганди. Ижтимоий тармоқдан фойдаланишнинг янги қоидалари ҳақида октябрь ойида маълум бўлганди.

Эндиликда Twitter одамлар гуруҳи ёки алоҳида фуқароларга қарши нафрат ва ғазабни тарғиб қилувчи фойдаланувчиларни блоклайди. Нафратни келтириб чиқарадиган тасвирлар ва белгилар ҳам аккаунтнинг доимий блокланишига олиб келиши мумкин.

Ноябрь ойининг охирида АҚШ президенти Дональд Трамп ўзининг Twitter’даги саҳифасида «мусулмонларга қарши» видеони ультра-ўнг Britain First ташкилотининг саҳифасидан репост қилган эди. Роликда ўзини мусулмон деб ҳисоблаган бир гуруҳ одамлар болакайни томдан итариб юборгани тасвирланган.