Twitter ma’muriyati Britain First ultra-o‘ng tashkilotining ijtimoiy tarmoqdagi akkauntini bloklab qo‘ydi. Bunga uning o‘z sahifasiga “musulmonlarga qarshi” videoni joylashtirgani sabab qilib ko‘rsatilmoqda. Ta’kidlash joizki, AQSh prezidenti Donald Tramp ham ushbu videoni repost qilgan edi. Bu haqda The Guardian’ga tayanib, “RBK” xabar berdi.
Shuningdek, harakat yetakchisi Pol Golding va uning o‘rinbosari Jeyda Frensenning ham Twitter’dagi akkauntlari bloklangan.
Avvalroq, ijtimoiy tarmoq xavfsizlik nutqai nazaridan shu kabi siyosatni boshlagani haqida xabar berilgandi. Ijtimoiy tarmoqdan foydalanishning yangi qoidalari haqida oktabr oyida ma’lum bo‘lgandi.
Endilikda Twitter odamlar guruhi yoki alohida fuqarolarga qarshi nafrat va g‘azabni targ‘ib qiluvchi foydalanuvchilarni bloklaydi. Nafratni keltirib chiqaradigan tasvirlar va belgilar ham akkauntning doimiy bloklanishiga olib kelishi mumkin.
Noyabr oyining oxirida AQSh prezidenti Donald Tramp o‘zining Twitter’dagi sahifasida “musulmonlarga qarshi” videoni ultra-o‘ng Britain First tashkilotining sahifasidan repost qilgan edi. Rolikda o‘zini musulmon deb hisoblagan bir guruh odamlar bolakayni tomdan itarib yuborgani tasvirlangan.
Izoh (0)