Braziliyalik mashhur futbolchi Kaka 35 yoshida faoliyatini yakunladi. U avvalroq “Orlando Siti” safida boshqa o‘ynamasligi haqida aytgandi. Endi esa biryo‘la futboldan ketayotganini ma’lum qildi.
Kaka 2007-yilning 17-dekabrida dunyoning eng yaxshi futbolchisi deb topilgan va “Oltin to‘p” bilan taqdirlangan. Bu yo‘lda unga Krishtianu Ronaldu hamda Lionel Messi raqobatchilik qilgandi. Qizig‘i, o‘sha 2007-yildan keyin Ronaldu va Messi “Oltin to‘p”larni hech kimga bermay, 5 martadan unga ega chiqishdi. O‘shanda Kaka men “Oltin to‘p”ni qo‘lga kiritgan “yerlik so‘nggi futbolchiman” degan ta’rifni berib, Krishti hamda Leoni ko‘kka ko‘targandi.
To‘liq ismi Rikardo Izekson dos Santos Leyte bo‘lgan Kaka 1982-yilning 22-aprel sanasida dunyoga kelgandi. Uning otasi injener, onasi esa o‘qituvchi bo‘lgan. Kaka 2002-yildan to 2014-yilga qadar Braziliya terma jamoasi safida 92 ta bellashuvda maydonga tushdi va raqiblar darvozasiga 29 ta gol urishning uddasidan chiqa oldi.
Kaka oilasi bilan San-Paulu shahriga ko‘chib kelib, shu yerdagi futbol maktablaridan birida qo‘nim topdi va undagi o‘yinlari bilan Braziliyada mashhur “San-Paulu” klubi skautlari nazariga tushdi. U 18 yoshida katta futbolda debyut qildi.
Birinchi mavsumidayoq Kaka 12 ta gol urib, o‘sha yili dunyoning eng yaxshi 100 futbolchisi qatoridan joy olgandi, deb yozdi “Championat.asia”. Keyinroq yarim himoyachi ilk jamoasi uchun 131 ta o‘yinda ishtirok etib, 48 bor muvaffaqiyat qozondi.
2003-yil Kaka “Milan”ga ko‘chib o‘tdi. Yangi jamoasi Braziliya klubiga 8,5 million yevro to‘ladi. Uning qadami qutlug‘ kelib, “Milan” ko‘p o‘tmay UEFA Superkubogida g‘olib chiqdi.
Milandagi ilk mavsum Kaka uchun omadli kechdi. U o‘zining ilk golini aynan derbida kiritdi. Mavsum yakunida gollari soni 10 ta edi. “Milan” esa A seriya chempionligiga ega chiqqandi.
2006—2007-yilgi mavsumni milanliklar qayg‘u bilan boshladi. Italiya futbolidagi kelishilgan o‘yinlar sabab klub mavsumni minus ochkolar bilan start oldirgandi. Biroq yakun quvonchli bo‘ldi va “Milan” Chempionlar Ligasida g‘oliblikni qo‘lga kiritdi. Kaka esa musobaqaning eng yaxshi futbolchisi deb topildi.
2009-yil “Manchester Siti” Kaka uchun 100 million yevro taklif qildi. Biroq futbolchining o‘zi APL klubiga o‘tishni istamadi va rekord bo‘lishi kutilayotgan transfer amalga oshmay qoldi. “Milan” iqtisodiy qiyinchiliklar bilan o‘ralashib qolgach esa, jamoa futbolchini Madridning “Real” klubiga 68,5 millionga pulladi. “Taklif shunchalik yaxshi ediki, jamoam uni inkor qila olmadi”, — deb tushuntirish bergandi Kaka.
6 yillik shartnoma davomida Kakaning faoliyati bir tekis kechmadi. U juda ko‘p marta jarohatlandi, hatto ilk yilida mavsumning yarmini o‘tkazib yuborishga majbur bo‘ldi. Shu tariqa u 2013-yil “Milan”ga qaytdi va ikki yillik kelishuvga erishdi. Biroq Milanni ham tez orada tark etdi. Shartnomasida jamoasi Chempionlar Ligasiga yo‘llanma ola bilmasa, u ketishi borasidagi band bor edi. Kaka shunday qila qoldi.
O‘tgan vaqt davomida Kaka milanliklar uchun 100-golini urib, bu jamoa safida 100 ta gol urgan tarixdagi o‘ninchi futbolchiga aylanib olgandi.
2014-yilning 1-iyul kuni AQShning “Orlando Siti” klubi Kaka bilan bitim imzoladi. U faoliyatini ham aynan shu klub safida yakunladi.
Kaka Braziliya termasi bilan 2002-yil jahon chempionligini qo‘lga kiritgandi. O‘shanda u Kosta-Rikaga qarshi birgina o‘yinda maydonga chiqarilgan va 25 daqiqa to‘p surgan, xolos. 2005 va 2009-yilgi mavsumlarda esa pentakampionlar bilan Konfederatsiyalar Kubogida zafar quchgan.
Kaka Italiya va Ispaniya chempioni, Chempionlar Ligasi g‘olibi, “Oltin to‘p” sohibi. Klublar o‘rtasida jahon chempioni bo‘lishga ham ulgurgan — 2007-yilda. Ispaniya va Italiyada kuboklar, superkuboklarni begona qilmagan.
2002-yil Braziliyada Kakani eng yaxshi deb topishdi. Italiyada esa bunday baxt futbolchiga ikki bor nasib qildi. Klublar mundialida ham “Oltin to‘p” aynan Kakaga topshirildi.
Izoh (0)