Исроил мудофаа армияси самолёти 18 декабрь куни яҳудийлар мамлакати ҳудудига ракета отилишига жавобан Ғазо секторининг шимолий қисмида жойлашган ҲАМAC машғулот лагерига зарба берди, деб ёзади «ТАСС».
«Исроил жануби бўйлаб учирилган ракеталарга жавобан мамлакат ҳарбий-ҳаво кучлари Ғазо секторининг шимолий қисмида жойлашган ҲАМAC машғулот лагерига зарба берди. Лагер ҳудудидаги учта тузилма, шунингдек террорчилик инфратузилмасининг қўшимча элементларига зарар етказилди», — дейилади хабарда.
Шунингдек, армия вакиллари «ҲАМAC террорчилик ташкилотини Ғазо секторидан амалга оширилган исталган адоватли ҳаракатга жавобгар деб ҳисоблашини» ҳам қўшимча қилган.
Ғазо секторидан учирилган икки ракета 17 декабрь, якшанба куни Исроил жанубидаги Хоф-Ашкелон кенгаши ҳудудида портлаган.
Биринчи ракета аҳоли яшаш жойидаги уйлардан бирига зарар етказиб, унинг ҳовлисида портлаган. Иккинчи ракета эса аҳоли яшамайдиган ҳудудга тушган.
Изоҳ (0)