Дональд Трамп унинг Қуддусни Исроил пойтахти сифатида тан олиш ҳақидаги қарори, шундан сўнг Яқин Шарқда рўй берган тўқнашувларга қарамай, тўғри бўлганига ишончи комил. Бу ҳақда АҚШ президенти матбуот котибининг биринчи ўринбосари Раж Шоҳ маълум қилди, дея хабар беради «РИА Новости».
«У юз бериши мумкин бўлган оқибатларни тўлиқ англаб етади. Бироқ бизнинг қатъий нуқтаи назаримиз шундай: Яқин Шарқда ҳалол воситачи бўлишни истасанг, мавжуд воқеликни тан олиш лозим. Бу мазкур йўналишдаги биринчи қадам», — деди Раж Шоҳ.
АҚШ президенти Дональд Трамп Қуддусни Исроил пойтахти деб тан олганидан сўнг фаластинликлар ва Исроил ҳарбийлари ўртасида тўқнашувлар юз берди. Бошқа мусулмон ўлкаларида ҳам АҚШнинг Қуддус бўйича қарорига қарши намойишлар бошланди.
Изоҳ (0)