Халқаро космик станциянинг қопламасида топилган микроблар тўлалигича «ерлик» келиб чиқишни намоён қилади ва NASA мутахассислари ҳамда Россиянинг тиббий-биологик муаммолар институти ходимлари учун қандайдир ноодатий ва янги нарса ҳисобланмайди. Бу ҳақда NASA’нинг космос биологияси ва физикасини ўрганиш бўйича бўлинмаси раҳбари Крейг Кундротга таяниб, «РИА Новости» хабар берди.
Жорий йилнинг май ойи охирида ХКСнинг ташқи қопламасидаги чангларни йиғаётган россиялик космонавтлар космик станция юзасида ҳаёт белгиларига эга микроб спораларини топгани ҳақида хабарлар тарқалган. Космонавт Александр Мисуркин сентябрь ойида бу топилма Ердаги ҳаёт космосдан келган бўлиши мумкинлигини кўрсатиши ҳақида маълум қилган.
Крейг Кундротнинг қайд этишича, бу микробларнинг келиб чиқиши ердан бўлиб, Ер орбитасига бошқа сайёралардан тушган «космос меҳмонлари» ҳисобланмайди.
Россиянинг «Бион-М» ва «Бион-М2» биойўлдошлари лойиҳасининг илмий раҳбари Владимир Сичев NASA олимининг фикрига қўшилган. Унинг таъкидлашича, Ерга ҳаётнинг космосдан келгани ҳақидаги назарий эҳтимол биринчи марта тўрт йил аввал тақдим этилган ва унда ҳеч қандай янги нарса айтилмаган.
Олимларнинг сўзларига кўра, бактериялар ХКС қопламасига ичкаридаги газларни чиқариш вақтида, шунингдек атмосферанинг юқори қисмидан тушиб қолади. Улар станциянинг қуёш тегмайдиган жойларида яшаши мумкин. Бу уларнинг атмосфера ва нурланишдан кўра вакуумда яхшироқ ривожлана олиши билан изоҳланади.
Изоҳ (0)