Ўзбекистон мусулмонлари идораси раиси муфтий Усмонхон Алимов XVIII қорилар мусобақасини мамлакатда юқори даражада ўтказиш ва унга пухта тайёргарлик кўриш ҳақида буйруқ чиқарди. Ҳужжатнинг учинчи бандига кўра, XVIII қорилар мусобақаси республиканинг ҳар бир туман (шаҳар) ва вилоятларида ўтказилади. Туман ва вилоят босқичлари 2018 йил 20 мартга қадар ўтказилиши белгиланган. Бу ҳақда «Azon.uz» хабар бермоқда.
Блогер Адҳам Атажонов Facebook’даги саҳифасида эълон қилган Ўзбекистон мусулмонлари идорасининг 01А/131- сонли буйруғига кўра, XVIII қорилар мусобақаси диний идора тасарруфидаги диний таълим муассасалари (9 та мадраса, Тошкент ислом институти ва Мир араб олий мадрасаси) ва Тошкент ислом университети талабалари, имом-хатиблар, имом-ноиблар ҳамда Қуръони карим қироати бўйича иқтидори бўлган фуқаролар ўртасида ўтказилади.
Эслатиб ўтамиз, Шавкат Мирзиёев 1 сентябрь куни Ҳазрати Имом (Хастимом) мажмуасида давлат ва жамоат ташкилотлари, Мусулмонлар идораси раҳбарияти, имом-хатиблар, маҳалла фаоллари билан учрашувда одамларни лол қилдира оладиган даражада Қуръони каримни тўлиқ ёдлаган болаларни тарбия қилиш кераклиги, агар биринчи ўринни олган одам масжидларда Қуръонни ўқиса одамларимизга таъсир қилиши ҳақида айтиб ўтган эди.
Изоҳ (0)