1 декабрь куни Ахборот технологиялари ва коммуникацияларини ривожлантириш вазирлигида Беларусь Юқори технологиялар парки асосчиси В.В.Цепкало билан учрашув бўлиб ўтди. Бу ҳақда вазирлик расмий сайтида хабар берилди.
Цепкало Ўзбекистонга иқтисодиётнинг АКТдан фойдаланишга асосланган юқори технологияли тармоқларини шакллантириш ва фаол ривожлантириш шароитлари, хусусан, яқинда ташкил қилинган, Mirzo Ulugbek Innovation Center ахборот технологияларини ишлаб чиқиш ва жорий қилишни қўллаб-қувватлаш инновация маркази фаолияти билан танишиш учун келди.
«Аҳолиси бизникидан уч марта кам бўлган Беларусда ўтган йили дастурий таъминот экспорти қарийб 1 миллиард АҚШ долларини ташкил қилди. Бунга В.Цепкало томонидан 12 йил аввал асос солинган юқори технологиялар паркида махсус солиқ ва ҳуқуқ режимини яратиш шарофати билан эришилди», — деб ёзди Ахборот технологиялари ва коммуникацияларини ривожлантириш вазири вазифасини бажарувчи Шерзод Шерматов ўз Facebook’ида.
Унинг айтишича, Беларусда ҳам дастлаб кўпчилик ушбу ташаббуснинг муваффақият қозонишига ишонмаган, аммо кейинчалик ўсиш кескин кўтарилиб кетган.
Таъкидланишича, Mirzo Ulugbek Innovation Center инновация марказини яратишда Беларуснинг Юқори технологиялар паркини ташкил қилиш бўйича илғор тажрибаси ҳам ўрганиб чиқилган.
Учрашув чоғида Цепкало инновация марказига шаклланишда ва компьютер дастурларини ишлаб чиқиш соҳасини ривожлантиришда зарур амалий ёрдамни кўрсатишга тайёрлигини билдирди. Бу, аввало, етакчи IT-корпорацияларни жалб қилиш ва Ўзбекистонда улар учун дастурий таъминот марказларини яратиш, Ўзбекистоннинг етакчи техника университетлари базасида IT-мутахассисларни тайёрлаш бўйича лабораторияларни яратишдир.
Томонлар дастурий таъминот ва ахборот технологиялари саноатини ўстириш ва ривожлантиришдаги ҳамкорлик бўйича тажриба алмашишда давом этишга келишиб олди.
Изоҳ (0)