Сурхондарё вилоятида жойлашган Жануби-ғарбий махсус ҳарбий округининг «Термиз дала-ўқув майдони»да Қуролли Кучлар миқёсида анъанавий равишда ўтказиб келинаётган «Энг илғор мутахассис» кўрик-танловининг якуний босқич жараёнлари бошланди. Бу ҳақда Мудофаа вазирлиги матбуот хизмати хабар бермоқда.
Унда Мудофаа вазирлиги қўшинлари, миллий хавфсизлик хизмати чегара қўшинлари, Ички ишлар вазирлиги қоровул қўшинларида кўрик-танловнинг дастлабки босқичлари бўйича энг илғор деб топилган 260 дан зиёд ҳарбий хизматчилар ўзаро куч синашмоқда.
Танловнинг тантанали очилиш маросимида Сурхондарё вилояти ҳокимлиги, Қуролли Кучлар тузилмаларига кирувчи вазирлик ва идоралар ҳамда давлат ва жамоат ташкилотлари вакиллари томонидан ушбу танловнинг ҳарбий хизмат нуфузини оширишда, юрт посбонлари қалбида танлаган касбига, Ватанга муҳаббат туйғусини шакллантиришдаги ўрни муҳимлиги таъкидланди.
Мазкур кўрик-танловда иштирокчилар жисмоний қобилиятларини синовдан ўтказиб, ҳарбий топография ҳамда умумий тактика фанларидан топшириқларни бажариш, тўсиқли йўлакдан ўтиш ҳамда мутахассислик бўйича тест синовларини топшириш каби вазифаларни бажаради.
Изоҳ (0)