Ўзбекистон Республикаси Жиноят Кодексининг 159 ва 244²-моддаларида кўрсатиб ўтилган оғир ва ўта оғир жиноятларни содир этганлиги учун фуқаро 1986 йилда Тошкент шаҳрида туғилган Тохтаходжаева Гузал Авазовна Учтепа туман ИИБ томонидан қидирилмоқда. Бу ҳақда Тошкент шаҳар ички ишлар бош бошқармаси расмий сайтида хабар берилди.
Белгилари: Бўйи 165—167 см, ўрта гавдали, кўзи юмалоқ жигарранг, қоши тўғри, оқ-сариқдан келган, юзи чўзинчоқ шаклда.
Г.А.Тохтаходжаевани кўрганлар ёки унинг қаерда эканлигини билганлар «102», 281-93-02, 281-92-80, 283-94-45, 284-93-23 телефон рақамларига ёки яқин атрофдаги ички ишлар органларига хабар бериши сўралди.
Маълумот учун: Ўзбекистон жиноят кодексининг 159-моддаси «Ўзбекистон Республикасининг конституциявий тузумига тажовуз қилиш» деб номланиб, у Ўзбекистон Республикасининг амалдаги давлат тузумини Конституцияга хилоф тарзда ўзгартиришга, ҳокимиятни босиб олишга ёхуд қонуний равишда сайлаб қўйилган ёки тайинланган ҳокимият вакилларини ҳокимиятдан четлатишга ёхуд Ўзбекистон Республикаси ҳудудий яхлитлигини Конституцияга хилоф тарзда бузишга очиқдан-очиқ даъват қилиш, шунингдек, бундай мазмундаги материалларни тарқатиш мақсадида тайёрлаш, сақлаш ёки тарқатиш;
Ҳокимият конституциявий органларининг қонуний фаолиятига тўсқинлик қилиш ёки уларни Конституцияда назарда тутилмаган параллел ҳокимият тузилмалари билан алмаштиришга қаратилган зўравонлик ҳаракатлари, шунингдек, давлат ҳокимияти ваколатли органларининг Ўзбекистон Конституциясида назарда тутилмаган тартибда тузилган ҳокимият тузилмаларини тарқатиб юбориш тўғрисидаги қарорларини белгиланган муддатда бажармаслик;
Ҳокимиятни босиб олиш ёки Ўзбекистон Республикаси конституциявий тузумини ағдариб ташлаш мақсадида фитна уюштириш қисмларини ўз ичига олади.
244²-модда эса диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этишни кўзда тутади.
Изоҳ (0)