Наманган вилоятида ўтказилган хатлов натижасида 244 та аввал хусусийлаштирилган ва бугунги кунда бўш турган объектлар аниқланди, деб хабар беради Давлат рақобат қўмитаси ахборот хизмати.
Улар қаторида Наманган шаҳридаги собиқ Global star текстиль трейд, Уйчи туманидаги «9-ХМКК», Чуст туманидаги «Текстиль фабрикаси» каби йирик корхоналар мавжуд.
Вилоятдаги бўш турган объектларнинг 203 таси негизида инвестиция лойиҳалари ишлаб чиқилган ва ушбу лойиҳалар бўш турган корхоналарни фаолиятини қайта ташкил қилишда туртки бўлмоқда. Мазкур лойиҳаларни амалга ошириш доирасида 107,0 миллиард сўмлик ва 26,9 миллион АҚШ долларлик инвестициялар ўзлаштирилиши ва 3 700 та янги иш ўринлари яратилиши кўзланган.
Бугунги қадар вилоятдаги 6 та йирик корхона фаолияти қайта тикланиб, 100 та қўшимча ишчи ўринлари барпо этилди. Мазкур корхоналарни ишга тушириш учун 20,0 миллиард сўмлик сармоялар киритилди.
Масалан, Янгиқўрғон туманида жойлашган собиқ текстиль фабрикасининг бўш турган биноси негизида «Салмон трейд» МЧЖ томонидан 3,0 миллиард сўм сармоя эвазига 25 та янги иш ўринлари яратилган.
Изоҳ (0)