Таиландда машҳур бўлган ва бир қанча фильмларда, хусусан асосий ролларда суратга тушган Эккасит лақабли фил 27 ноябрь куни ўзининг ўргатувчисини ўлдириб қўйган. Ҳодиса ўргатувчининг рафиқаси ва бошқа ўргатувчиларнинг кўз олдида мамлакат шимолидаги Чиангмай провинциясининг ҳайвонот боғида юз берган. Бу ҳақда «РИА Новости» хабар берди.
Фил билан ўн йилдан зиёд ишлаб, бир нечта фильмларда бирга суратга тушган ўргатувчи душанба куни ҳайвонни овқатлантирган ва уни боғланган дарахтидан ечиб, чўмилтириш ва суғориш учун дарёга олиб борган. Кутилмаганда фил ўргатувчига ҳужум қилиб, унга тишлари ва олд оёқлари билан зарба берган. Яқин атрофда бўлган бошқа ўргатувчилар бир неча дақиқа давомида уни қутқаришга ҳаракат қилган. Бироқ улар ўргатувчининг жони узилгандагина филни ҳайдашга муваффақ бўлган.
Хабарга кўра, ҳайвоннинг ҳужум қилишига сабаб унда бошланган жуфтлашиш мавсуми бўлган. Эркак филлар жуфтлашиш мавсумида организмда ажралиб чиқадиган гормон сабабли атрофдагилар учун хавфли бўлиб қолади. Фожиа кўпинча ўргатувчи жуфтлашиш мавсуми бошланганини сезмай қолганда юз беради. Бунда ўргатувчилар мавсум бошланганини сезмасдан, фил билан аввалгидек муносабатда бўлишда давом этади.
Хабар берилишича, Эккасит 2018 йилнинг апрель ойигача Чиангмай ҳайвонот боғидаги фил шоусида чиқиш қилиш керак. Ҳодисадан сўнг фил вақтинчалик аренадан четлатилади.
Изоҳ (0)