Tailandda mashhur bo‘lgan va bir qancha filmlarda, xususan asosiy rollarda suratga tushgan Ekkasit laqabli fil 27-noyabr kuni o‘zining o‘rgatuvchisini o‘ldirib qo‘ygan. Hodisa o‘rgatuvchining rafiqasi va boshqa o‘rgatuvchilarning ko‘z oldida mamlakat shimolidagi Chiangmay provinsiyasining hayvonot bog‘ida yuz bergan. Bu haqda “RIA Novosti” xabar berdi.
Fil bilan o‘n yildan ziyod ishlab, bir nechta filmlarda birga suratga tushgan o‘rgatuvchi dushanba kuni hayvonni ovqatlantirgan va uni bog‘langan daraxtidan yechib, cho‘miltirish va sug‘orish uchun daryoga olib borgan. Kutilmaganda fil o‘rgatuvchiga hujum qilib, unga tishlari va old oyoqlari bilan zarba bergan. Yaqin atrofda bo‘lgan boshqa o‘rgatuvchilar bir necha daqiqa davomida uni qutqarishga harakat qilgan. Biroq ular o‘rgatuvchining joni uzilgandagina filni haydashga muvaffaq bo‘lgan.
Xabarga ko‘ra, hayvonning hujum qilishiga sabab unda boshlangan juftlashish mavsumi bo‘lgan. Erkak fillar juftlashish mavsumida organizmda ajralib chiqadigan gormon sababli atrofdagilar uchun xavfli bo‘lib qoladi. Fojia ko‘pincha o‘rgatuvchi juftlashish mavsumi boshlanganini sezmay qolganda yuz beradi. Bunda o‘rgatuvchilar mavsum boshlanganini sezmasdan, fil bilan avvalgidek munosabatda bo‘lishda davom etadi.
Xabar berilishicha, Ekkasit 2018-yilning aprel oyigacha Chiangmay hayvonot bog‘idagi fil shousida chiqish qilish kerak. Hodisadan so‘ng fil vaqtinchalik arenadan chetlatiladi.
Izoh (0)