28—29 ноябрь кунлари Тошкент шаҳрида «Ўзбекистон маданий мероси» мультимедиа лойиҳаси доирасида «Замонлар чорраҳаси: ўтмишнинг буюк мероси — маърифатли келажак пойдевори» мавзусидаги халқаро медиа-форум ўтказилмоқда.
Тадбирда дунё илм-фанининг етук намоёндалари, музей, кутубхона, илмий институт ва халқаро ташкилотлар раҳбарлари, маҳаллий олим ва экспертлар ҳамда ОАВ ходимлари иштирок этмоқда.
Медиа форумда «Шарқ ёзма ёдгорликлари дурдоналари» лойиҳасининг тақдимоти ўтказилиши режалаштирилган. Унинг доирасида хориж тўпламларида сақланаётган бебаҳо қадимий қўлёзмаларнинг факсимиле нусхалари Ўзбекистон коллекциясига бериш учун чоп этилмоқда.
Улардан биринчи бўлиб «Катта Лангар Қуръони», «Девони Султон Ҳусайн Бойқаро», «Равзат ус-Сафо» («Поклик боғи»), «Меърожнома» ва «Темур тузуклари» чоп этилди.
Россия Федерацияси Фанлар академиясининг Шарқ қўлёзмалари институти ва Франция Миллий кутубхонасида сақланаётган ушбу китобларнинг факсимиле нусхалари Европанинг машҳур босмахоналаридан бирида юқори технологиялар бўйича тайёрланган. Улар максимал даражада асл нусхасига яқин, табиий олтин қопламали қоғозда яратилган. Нусхалар шунчалик ҳашаматдорки, уларни фолиолардан фарқлаш мушкул. Ушбу нусхаларнинг Ўзбекистон ҳукумати ва халқига топширилиши халқаро медиа-форумнинг асосий гуманитар воқеаси бўлади.
Шунингдек, форумда «Ўзбекистон маданий мероси» лойиҳаси доирасида чоп этилган навбатдаги бешта китоб-альбомнинг тақдимоти ҳамда уларни 49 та давлатнинг 136 та музей ва кутубхоналарига тантанали топшириш маросими бўлиб ўтади.
Изоҳ (0)