Хитойлик ишбилармон ЙТҲни уюштириб, Jaguar маркали автомобилини дарёга чўктирмоқчи бўлганида унинг ўзи чўкиб кетди. Бу ҳақда «РИА Новости» хабар берди.
Хабар берилишича, Ли фамилияли эркак машинасининг суғурта қиймати унинг савдодаги қийматидан юқори бўлишини билгач, уни дарёга чўктиришга қарор қилган.
Эркак аварияни пухта режалаштирган. Биринчи босқичда у машинани масофадан бошқаришга имкон берувчи қурилмадан фойдаланган. У машинани Хитойнинг Чжэцзян провинциясидаги Вэньлин аҳоли пункти яқинидан ўтувчи дарёга чўктирган. Шундан сўнг у 29 ёшли таниши Чжан фамилияли қиз билан дарёга сакраган.
Режага кўра, қиз дарҳол сувдан чиқиши, эркак эса масофадан бошқариш қурилмасини олиш учун машинага бориши керак бўлган. Кейин эса қиз полицияни чақириши, шундан сўнг автомобиль эгаси қирғоққа чиқиши керак бўлган.
Полицияни ишонтиришга осон бўлиши учун рулни қиз бошқарганини айтиш режалаштирилган эди. Бироқ эркак сувда узоқ вақт қолиб кетгач, қиз ёрдам чақиришга қарор қилган. Маҳаллий аҳоли Лини сувдан олиб чиққан. Бироқ тез ёрдам ва полиция етиб келгунига қадар эркак вафот этган. Қизнинг фикрича, Ли машинадаги масофадан бошқарув қурилмасини олиш вақтида унинг ичида қолиб кетган.
Шериклар дарёнинг мазкур қисмида чуқурлик бир метрдан ошмайди, деб ўйлаган. Шунинг учун шу жойни танлаган. Бироқ дарёнинг бу жойида чуқурлик икки метрдан ортиқ бўлиб чиққан.
Терговчининг сўзларига кўра, қиз ҳодиса қандай юз берганини аниқ тасвирлаб бера олмаган. Бундан ташқари, унинг телефони ва баъзи буюмлари қуруқ бўлган. Шунинг учун терговчи бу ҳодиса уюштирилган, деган хулосага келган. Кейинчалик қиз бунга иқрор бўлган ва вафот этган эркак ундан режани амалга оширишда иштирок этишини сўраганини айтган.
Қизга қандай жазо қўлланилиши номаълум, бироқ суғурта компанияси бу ҳолат учун ҳеч нарса тўламаслигини маълум қилган.
Изоҳ (0)