Россияда автомобиль ҳайдовчиларини профессионаллар ва ҳаваскорларга бўлиш режалаштирилмоқда. Бу ҳақда «Российская газета» хабар берди.
Профессионаллар автобус, юк машиналарини бошқариши, такси ҳайдаши, ҳаваскорлар эса автодан шахсий мақсадда фойдаланиши мумкин.
Ҳайдовчилик гувоҳномаларида профессионал тайёргарликни тасдиқловчи белги пайдо бўлиши кутилмоқда. Мазкур белги бўлмаган тақдирда талабгор ҳайдовчи сифатида ишга олинмайди.
Профессионаллар ва ҳаваскорлар турли дастурлар асосида ўқитилади. Биринчилар учун, табиийки, унинг кўлами кенгроқ бўлади. Жумладан, улар кўзда тутилмаган вазиятларда машинани бошқариш, тиркама ёки икки қаватли автобусларни ҳайдаш, хавфли юк ёки йўловчиларни ташишга ўргатилади. Улар 5 йилда бир маротаба қайта имтиҳон топшириши кўзда тутилган.
Ҳайдовчиларни тайёрлаш тизимини ислоҳ қилишни Россия транспорт вазирлиги таклиф этмоқда. Мақсад профессионал ҳайдовчилар тайёрлаш сифатини оширишдан иборат. Шу билан бирга, ушбу янгилик жорий этилгунча олинган гувоҳномалар ҳам амалда бўлади.
Изоҳ (0)