Хабар беришларича, 1979 йилда туғилган янгийўллик Нуриддин Абулғозиев уч шериги билан бирга «Дилшод Авто Савдо» компаниясига асос солиб, ҳужжатларга кўра, автомобиль олди-сотдисида воситачилик фаолияти билан шуғулланган. Бироқ тергов жараёнида фирма бир ниқоб бўлгани, аслида Нуриддин Абулғозиев молиявий пирамидага асос солгани маълум бўлган.
Нуриддин Абулғозиев, худди чинозлик Аҳмадбой сингари, жуда катта миқдорда фоиз тўлови ваъдаси билан аҳолидан пул, қимматбаҳо тақинчоқлар, мол-мулк ва автотранспорт воситаларини қабул қилган. Олинган бойликлар эски омонатчиларнинг фоиз тўловларини қоплаш учун йўналтирилган, қолган пулни эса у ўз эҳтиёжи йўлида сарфлаб юборган.
«Алданган кишилар сони юзлаб, фирибгарларнинг айланма пуллари эса миллиардлаб сўмни ташкил қилди», — дейди «Ахборот 24» мухбири.
Телелавҳада Нуриддин Абулғозиев жиноят ишлари бўйича Янгийўл туман судида суд қилингани, унга нисбатан тегишли жазо чоралари кўрилгани таъкидланади. Туман суди раиси Баҳром Тошпўлатовнинг сўзларига кўра, Абулғозиевга нисбатан илгари сурилган айбловлар ўз исботини топган, айбдорларга тегишли жазо тайинланган.
Бироқ лавҳа давомида Нуриддин Абулғозиевга нисбатан қандай айблов эълон қилингани ва унга нисбатан қандай жазо чораси қўлланилгани ҳақида аниқ маълумот берилмаган. Судья Тошпўлатовнинг қўшимча қилишича, жабрланувчиларга етказилган зарарлар судланувчилар ҳисобидан ундирилиши белгиланган.
Бундан ташқари, суд судланувчилар ҳали ўз ихтиёрига ўтказиб улгурмаган пул маблағлари ва автомобилларни қонуний эгаларига қайтариш ҳақида қарор чиқарган. «Ахборот 24»да маълум қилинишича, бундай автомобиллар сони 125 тани, пул маблағлари миқдори эса 700 миллион сўмни ташкил этади.
2016 йил 30 июнь куни Ўзбекистон телевидениеси орқали эфирга узатилган «Аҳмад васвасаси» номли кўрсатувда Нуриддин Абулғозиев ноқонуний йўл билан орттирган бойликлари ҳисобига Янгийўл шаҳрида жойлашган кўп қаватли 140-уйнинг биринчи қаватини тўлиқ сотиб олиб, у ерда фитнес-клуб қуришни бошлаб юборгани, Тошкент шаҳридаги «Диёрбек» меҳмонхонасига, Зангиота туманидаги «Юксалиш» тўйхонасига эгалик қилиши айтилган эди. Қўлга олиниши арафасида, у Қибрай туманида ўзи учун данғиллама ҳовли қурдираётган бўлган.
Нуриддин Абулғозиев қўлга олинган вақтда унга тегишли автомобиллар турар жойидан аҳолидан қабул қилиб олинган 62 та турли русумдаги автомобиллар борлиги аниқланган. «Аҳмад васвасаси» кўрсатувида Нуриддин Абулғозиевдан ташқари, Аҳмадбойнинг «шогирдлари», «ҳамтовоқлари» дея таърифланган Қувончбек Абдулқосимов ва Мирзамурод Юнусалиев (Муродбой) ҳақида ҳам сўз борган эди, бироқ уларнинг ҳозирги аҳволи ҳақида очиқ маълумотлар йўқ.
Қайд этиш жоиз, 2017 йил август ойида — қўлга олинганидан кейин бир йилдан кўпроқ вақт ўтиб, Аҳмадбой иши бўйича суд эшитувлари бошланган эди. 4-сентабга қадар иш бўйича камида учта (9 август куни, 14 август куни, 24 август куни) суд эшитувлари бўлиб ўтган, судда жабрланувчиларнинг кўрсатмалари тингланган эди. Суд мажлисларида Аҳмадбойнинг ўзи ҳам қатнашган.
Изоҳ (0)