Вазирлар Маҳкамасининг «Тошкент шаҳри аҳолисини қишлоқ хўжалик ва чорвачилик маҳсулотларининг асосий турлари билан кафолатли таъминлаш тизимини янада такомиллаштириш чора-тадбирлари тўғрисида»ги қарори қабул қилинди. Бу ҳақда Norma хабар бермоқда.
Ҳужжат билан Тошкент шаҳар ҳокимлиги таъсисчилигида «Тошкент агро захира хизмат» унитар корхонаси тузилиши маъқулланди. Шаҳар аҳолисига қишлоқ хўжалик ва чорвачилик маҳсулотларини ўз вақтида етказиб бериш ҳамда сотиш, ички истеъмол бозорида нархлар барқарорлигини таъминлаш, қишки-баҳорги мавсумда уларнинг сунъий ошиб кетишининг олдини олиш корхонанинг асосий вазифалари қаторига киради.
Маҳсулотларнинг етарлича захираси тайёрлаш учун Тошкент вилоятининг Оҳангарон туманида («Бирлик», «Шодмалик», «Ғаллақудуқ» ва «Дўстлик» массивлари) қишлоқ хўжалиги фаолияти учун камида 10 минг гектар, чорвачилик учун камида 20 минг гектар ерлар ажратилиши кўзда тутилган.
Шунингдек, Тошкент шаҳри массивларида типовой лойиҳалар асосида ихчам савдо дўконлари (дала дўконлари) ўрнатилишига рухсат берилди. Уларда деҳқон-фермер хўжаликлари ўз маҳсулотларини сотиши мумкин.
Изоҳ (0)