Мисрдаги масжидда юз берган теракт қурбонлари сони 300 кишидан ошди

Синай яриморолидаги теракт қурбонлари сони 305 кишига етди. Бу ҳақда, Миср давлат ахборот агентлиги ва Reuters’га асосланиб, «РБК» хабар бермоқда. Аввалроқ теракт оқибатида 235 киши ҳалок бўлгани ҳақида хабар берилган эди.

Террорчилик ҳужуми 24 ноябрь, жума куни Синай шимолидаги Бир ал-Обид шаҳрида жойлашган масжидда, жума намози вақтида юз берган. Миср Бош прокуратураси ахборотига кўра, ҳужумда 25—30 нафар жангари қатнашган, уларнинг ёнида ИШИД террорчилик ташкилоти байроғи бўлган.

Аввалроқ жангарилар тўртта йўлтанламас машинада масжид олдига келиб, портловчи қурилмани ишга туширгани, сўнг намозгоҳга келганларга қарата ўт очгани ҳақида хабар берилган эди.

Миср Мудофаа вазирлиги вакили Тамер Рифаийнинг сўзларига кўра, терактга алоқадор жангарилар Синайнинг Ар-Рисан шаҳрида йўқ қилинган. Уларни йўқ қилиш бўйича операцияда дронлардан фойдаланилган. Операция давомида жангариларнинг таянч нуқталари, қурол-яроғ омборлари топилган.

Масжиддаги терактдан сўнг, Мисрда уч кунлик мотам эълон қилинди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.