Денвер шаҳри суди аёллар ва қизларни ўғирлаб, уларни сотиб юбориш билан шуғулланган америкалик эркакни 472 йилга озодликдан маҳрум этди. Бу ҳақда, Fox31 телеканалига таяниб, «ТАСС» хабар берди.
Маълумотларга кўра, 31 ёшли Брок Фрэнклин бу турдаги жиноят учун АҚШ тарихидаги энг узоқ қамоқ жазосини олган.
«400 йилга озодликдан маҳрум этиш — бутун мамлакатга биз одамларга нисбатан ишлатилаётган зўравонликларга қарши қандай чора кўришимизни англатувчи сигнал», — дейди штат бош прокуратураси вакили Жанет Дрейк.
Хабар беришларича, суд Фрэнклинни 30 та модда бўйича айбдор деб топган.
Судланувчи одам савдоси билан шуғулланувчи жиноий гуруҳга етакчилик қилган. Гуруҳ аъзолари ўз қурбонларини Facebook’даги мулоқотлар орқали ўзига жалб қилиб, уларни онлайн режимида мижозларга тақдим этган.
Жиноий гуруҳнинг етти нафар аъзоси бўлган, уларнинг тўрт нафари айбдор деб топилган ва турли муддатларга озодликдан маҳрум этилди.
Халқаро меҳнат ташкилотининг маълумотларига кўра, ҳозирги кунда 21 миллион одам мажбурий меҳнатдан азият чекади. Уларнинг 55 фоизи (ёки 11,4 миллиони)ни аёллар, 26 фоизини эса болалар ташкил этади.
Одам савдоси деярли барча мамлакатларда учрайди. Европада бу савдодан жабрланувчилар сони салкам бир миллионга, Жанубий ва Жануби-Шарқий Осиёда эса 11,7 миллионга тенг. Бу фаолиятдан келадиган йиллик даромад 150 миллиард доллардан ортиқ.
Изоҳ (0)