Андижон шаҳар ҳокими коллеж директорларини ҳақорат қилаётгани ёзилган аудио эълон қилинди

Интернетда Андижон шаҳар ҳокими Дилмурод Раҳматуллаев шаҳардаги касб-ҳунар коллежлари директорларини ҳақорат қилаётгани ёзилган аудио пайдо бўлди. Аудиоёзувни эълон қилган «Kun.uz» нашрига кўра, коллеж директорлари шаҳар ҳокими томонидан ҳақорат қилинган йиғилиш 16 октябрь куни бўлиб ўтган.Аудиоёзувда ҳоким Дилмурод Раҳматуллаев пахта йиғим-теримига ҳашарчиларни белгиланган сонда (беш кишидан) етказиб бера олмаган коллежларнинг директорларини бирма-бир турғазиб, танбеҳ бераётгани, уларни тинимсиз ҳақорат қилаётганини эшитиш мумкин.

«Ҳокимиятнинг кучини кўрсатиб қўяман сенларга!», — деб, ҳоким коллеж директорларига таҳдид қилган; қўл остидаги масъуллардан бирига «айбдор» коллежларга текширув гуруҳларини «ташлаш» бўйича кўрсатма берган. Гап орасида коллеж директорларини «Андижон шаҳрининг душманлари» деб айтган.

Овози ҳокимники деб айтилаётган шахс «айбдор»ларни тинимсиз равишда «ифлос», «шакал» деб атаган, ҳашарчи етказиб бера олмаган баъзи коллежларнинг вакилларини «гадой» деб таърифлаган. Эркаклар ҳам, аёллар ҳам бирдек ҳақоратланган. Раҳматуллаев Машинасозлик коллежидан келган вакилни: «Сен ифлоссан, одам эмассан! Маҳлуқсан! Андижон шаҳрининг фидойиси эмасман! Эй, эшак! Эй, ҳайвон!», — деб гапирган.

«Тупурганман сенларга!», — дейди ҳоким мажлисда йиғилган «айбдорлар»га. Мажлисда шаҳардаги 50 мактаб, 12 коллеж ва лицей директорлари, 70 та мактабгача таълим муассасалари мудирлари, имомлар, тиббиёт муассасалари раҳбарлари, ички ишлар бўлими бошлиғи ва прокурор қатнашган.

Шунингдек, «Kun.uz» ҳоким Раҳматуллаев июль ойида таълим соҳаси ходимлари (ўқитувчилар) мажбурий меҳнатга жалб этилмаслиги ҳақида гапирганига ҳам эътибор қаратган.

Маълумот учун, Ўзбекистон Президенти Шавкат Мирзиёев 15 ноябрь куни бўлиб ўтган видеоселектор йиғилишида қўл остидаги ходимларни ҳақорат қилиб, ҳатто уларга қўл кўтараётган ҳоким ва раҳбарларни «давлат ва Президент сиёсатига қаршилар» деб баҳолаган эди.