Ўзбекистон Олий судида Ўзбекистон Республикаси Маъмурий суд ишларини юритиш тўғрисидаги кодекс лойиҳаси, Иқтисодий процессуал кодекси лойиҳаси ҳамда янги таҳрирдаги Фуқаролик процессуал кодекси лойиҳаси муҳокамасига бағишланган давра суҳбати бўлиб ўтди, деб хабар берди ЎзА.
Маъмурий судлар Ўзбекистон Республикаси ягона суд тизимининг таркибий қисми ҳисобланади. Уларнинг фаолияти Ўзбекистон Конституцияси ва «Судлар тўғрисида»ги қонун билан белгиланган тамойилларга асосланган. Шу сабабли барча процессуал кодекслардаги умумий қоидалар, барча суд инстанцияларидаги ишларни кўриб чиқиш тартиби, суд ҳужжатларини ижро этиш бўйича иш юритишни тартибга солувчи нормалар ўхшаш бўлиб, фақат ҳар бир суднинг вазифалари хусусиятларидан келиб чиқиб фарқланади.
Давра суҳбатида Ўзбекистон Республикаси Иқтисодий процессуал кодекси лойиҳаси ҳам кенг муҳокама қилинди.
2017—2021 йилларда Ўзбекистонни ривожлантиришнинг бешта устувор йўналиши бўйича Ҳаракатлар стратегиясида фуқароларнинг ҳуқуқ ва эркинликларини мустаҳкам ҳимоя қилиш, одил судлов эркинлигини, суд иш юритувининг самарадорлиги ва сифатини кўтариш суд-ҳуқуқ соҳасидаги ислоҳотларнинг муҳим йўналишлари сифатида белгиланган. Бу ўз навбатида Ўзбекистон Фуқаролик процессуал кодексини янги таҳрирда қабул қилишни тақозо этади.
Янги таҳрирдаги Фуқаролик процессуал кодекси лойиҳасида амалдаги нормалар замон талабларига мос равишда такомиллаштирилган, мавжуд ҳуқуқий бўшлиқлар тўлдирилган.
Тадбирда кодекслар лойиҳалари юзасидан мутахассисларнинг фикр-мулоҳазалари тингланди, журналистларни қизиқтирган саволларга жавоб берилди.
Изоҳ (0)