Сирдарё вилоятининг Гулистон шаҳрида «Маҳаллаларда жиноятчилик ва ҳуқуқбузарликларнинг барвақт олдини олишга қаратилган чора-тадбирларни амалга ошириш механизмлари» мавзусида ўқув семинари ўтказилди. Бу ҳақда ЎзА хабар бермоқда.
Тадбирда жамоат ташкилотлари, маҳалла фуқаролар йиғинлари раислари, диний маърифат ва маънавий-ахлоқий тарбия масалалари бўйича маслаҳатчилар, профилактика инспекторлари, «Маҳалла посбони» жамоатчилик тузилмаси вакиллари, фуқароларнинг ўзини ўзи бошқариш органлари фаолиятини мувофиқлаштириш бўйича туман ва шаҳарлар кенгашлари ходимлари иштирок этди.
Вилоятдаги 221 фуқароларнинг ўзини ўзи бошқариш органлари тегишли давлат ва жамоат ташкилотлари билан ҳамкорликда кенг кўламли ишларни амалга оширмоқда. Жумладан, жорий йил ўтган даврида вилоятнинг 15 маҳалласида бирорта ҳам жиноят содир этилмаган.
Семинарда нотинч оилалар билан ишлашдаги муаммолар, аҳоли бандлигини таъминлаш борасидаги камчиликлар жиноятчилик ва ҳуқуқбузарликлар содир бўлишига олиб келиши мумкинлигига алоҳида эътибор қаратилди.
Изоҳ (0)