Қорақалпоғистоннинг Кегайли туманида қамиш, буғдой, шоли сомони, пахта ғўзапоясидан целлюлоза ва қоғоз массаси ишлаб чиқаришга ихтисослашган хорижий сармоя иштирокидаги «Кегейли қогуз» масъулияти чекланган жамияти ташкил этилди. Бу ҳақда Қорақалпоғистон ахборот агентлиги хабар бермоқда.
Корхонанинг умумий қиймати 5,1 миллион доллар бўлиб, Нукус шаҳридаги «Давр қурилиш» МЧЖ қурувчилари томонидан бугунги кунгача 1,2 миллиард сўмлик қурилиш ишлари бажарилди. Корхонага зарур асбоб-анжомларни олиб келиш учун Миллий банк Нукус филиали томонидан 1 миллион доллар кредит ажратилиши кутилмоқда.
«Йилига 18250 тонна целлюлоза ишлаб чиқариш қувватига эга корхонани 2018 йилнинг иккинчи чорагида ишга тушириш режалаштирилган.Биринчи босқичда 100 та янги иш ўрни яратилади. Корхонага фермер хўжаликлари, оилавий пудратчилар ва аҳолидан йилига 40 минг тонна хом ашё сотиб олинади. Иккинчи босқич ишга тушгач, яна 50 та янги иш ўрни яратилиб, қоғоз ишлаб чиқариш йўлга қуйилади», — дейди масъулияти чекланган жамият раиси ўринбосари Шуҳратилла Ҳикматов.
Изоҳ (0)