Ўзбекистон Республикаси Президенти Шавкат Мирзиёевнинг Корея Республикасига ташрифига тайёргарлик доирасида Олий ва ўрта махсус таълим вазири Иномжон Мажидов иштирокида Ажу университети ҳамда (POSTECH) Пхохан фан ва технологиялар университетларининг кампус ва филиалларини очиш, шунингдек биргаликда кадрларни тайёрлаш бўйича ҳамкорликни кенгайтириш юзасидан келишувларга эришилди.
Ҳозирги кунда Ўзбекистон Олий ўқув юртлари Корея Республикасининг 45 дан зиёд университетлари ва илмий ташкилотлари билан ҳамкорлик қилиб келмоқда. Ушбу ҳамкорлик илмий тадқиқотлар ва таълим олишга доир фаолиятни амалга оширишда алоқаларни кенгайтириш, профессор-ўқитувчилар, талабалар алмашуви ва биргаликда конференциялар, илмий изланишлар ташкил этишни қамраб олади.
2017 йилнинг биринчи ярмидаёқ Олий ўқув юртлари ўртасида бўлиб ўтган ҳамкорлик доирасида Ўзбекистон университетлари маъмурияти ва ўқитувчилари орасидан 70 дан ортиқ киши Корея Республикаси университетларининг симпозиум ва конференцияларида иштирок этди.
Бу вақт давомида шунингдек, Ўзбекистон олий ўқув юртларида Корея Республикасининг Инҳа, Кимёнг, Шингу, Жонгбу, Сангжи, Пусан миллий университетлари, Корея Республикаси тараққиёт институти ва бошқа билим юртларининг 30 дан ортиқ вакиллари билан учрашувлар бўлиб ўтди.
Бундан ташқари Ўзбекистондан 50 дан ортиқ талабалар Корея Республикаси университетларига магистратура ва докторантура йўналишларида ўқишларини давом эттириш ҳамда амалиёт ўташ учун юборилган.
Изоҳ (0)