Qoraqalpog‘istonning Kegayli tumanida qamish, bug‘doy, sholi somoni, paxta g‘o‘zapoyasidan sellyuloza va qog‘oz massasi ishlab chiqarishga ixtisoslashgan xorijiy sarmoya ishtirokidagi “Kegeyli qoguz” mas’uliyati cheklangan jamiyati tashkil etildi. Bu haqda Qoraqalpog‘iston axborot agentligi xabar bermoqda.
Korxonaning umumiy qiymati 5,1 million dollar bo‘lib, Nukus shahridagi “Davr qurilish” MChJ quruvchilari tomonidan bugungi kungacha 1,2 milliard so‘mlik qurilish ishlari bajarildi. Korxonaga zarur asbob-anjomlarni olib kelish uchun Milliy bank Nukus filiali tomonidan 1 million dollar kredit ajratilishi kutilmoqda.
“Yiliga 18250 tonna sellyuloza ishlab chiqarish quvvatiga ega korxonani 2018-yilning ikkinchi choragida ishga tushirish rejalashtirilgan.Birinchi bosqichda 100 ta yangi ish o‘rni yaratiladi. Korxonaga fermer xo‘jaliklari, oilaviy pudratchilar va aholidan yiliga 40 ming tonna xomashyo sotib olinadi. Ikkinchi bosqich ishga tushgach, yana 50 ta yangi ish o‘rni yaratilib, qog‘oz ishlab chiqarish yo‘lga quyiladi”, — deydi mas’uliyati cheklangan jamiyat raisi o‘rinbosari Shuhratilla Hikmatov.
Izoh (0)