Нью-Йоркда БМТ Бош ассамблеяси иккинчи қўмитаси иши доирасида иқтисодий, экологик ва молиявий масалаларга тегишли резолюциялар кўриб чиқилди. Бу ҳақда Қирғизистон ташқи ишлар вазирлиги маълум қилди, дея хабар беради K-News.
«‘Бир томонлама иқтисодий чоралар ривожланаётган давлатларни сиёсий ва иқтисодий мажбурлаш воситаси сифатида’ номли резолюцияни кўриб чиқиш давомида Қирғизистоннинг доимий вакили Миргул Молдоисаева Қозоғистон 10 октябрдан бери одамлар, транспорт ва товарлар ҳаракатланишига сунъий тўсиқлар қўйиб келаётганини маълум қилди. БМТга аъзо давлатлар қирғиз-қозоқ чегарасида юзага келган вазият, Қирғизистонга иқтисодий зарар келтириш, мамлакатнинг инвестициявий ва туризм соҳасидаги жозибадорлигига путур етказиш учун иқтисодий ва транспорт қамали қўлланаётгани ҳақида хабардор қилинди», — дейилади вазирлик хабарида.
Мазкур ҳужжат қабул қилиниши учун 116 давлат, жумладан, Қирғизистон овоз берди, 49 мамлакат бетараф бўлди, АҚШ ва Исроил қарши чиқди.
Изоҳ (0)